İsrailin Baş naziri Binyamin Netanyahu Avropa İttifaqının (Aİ) Xarici Əlaqələr üzrə Ali Nümayəndəsi Federika Moqerininin İranla nüvə razılaşmasını qorumaq lazım olması haqdakı bəyanatını provakasyon məcrada şərh edib.
Eurasia Diary-nin məlumatına görə, İsrail mediasında yer alan xəbərdə qeyd edilir ki, F.Moqerini iyul ayının 15-də İranla müqavilənin mükəmməl olmadığını, lakin hələ də qüvvədə olduğunu bildirib. O, eyni zamanda Aİ-nin İranın nüvə razılaşmasının şərtlərinə tam uyğun səviyyəyə dönməsi üçün ortaq kompleks hərəkat planı çərçivəsində işləri davam etdirəcəyini söyləyib.
İsrailin Baş naziri B.Netanyahu isə özünün “Tvitter” hesabında Təl-Əvivin günəşin qürubu zamanı görüntüsü fonunda video təqdim edib.
"Avropa İttifaqının İranın müqavilə şərtlərini pozmasına reaksiyası 30-cu illərin mütiliyini xatırladır. O zaman da başlarını qumda gizlətmiş və yaxınlaşan təhlükəni görməyənlər var idi. Görünür, avropalılar İranın nüvə raketlərinin Avropaya düşməyəcəyi təqdirdə oyanmayacaqlar. Lakin onda çox gec olacaq. Hər halda biz İranın nüvə silahı əldə etməsinin qarşısını almaq üçün lazım olan işləri görməkdə davam edəcəyik " –deyə Netanyahu sosial şəbəkədə paylaşdığı video-müraciətində vurğulayıb.(moderator.az)
