Nobel Sülh Mükafatı laureatı, "Kasıbların bankiri" kitabının müəllifi, Banqladeşli professor Məhəmməd Yunus prestijli Olimpiya mükafatına layiq görülüb.
81 yaşlı Məhəmməd Yunus “Olimpiya Dəfnəsi” mükafatını Dakkadakı evində canlı bağlantı ilə Tokio Olimpiadasının açılış mərasiminə qoşularaq alıb. Bununla o ölkəsinin adını Olimpiya tarixinə yazıb.
Beynəlxalq Olimpiya Komitəsindən verilən açıqlamaya görə, Məhəmməd Yunus 2016-cı ildə "idmanın köməyi ilə təhsil, mədəniyyət, inkişaf və sülh sahəsində əhəmiyyətli nailiyyətlər əldə edən" insanları mükafatlandırmaq üçün təqdim olunan “Olimpiya Dəfnəsi”nin ikinci laureatıdır.
Yunus Sosial Biznes Mərkəzi və Beynəlxalq Avrasiya Mətbuat Fondu (BAMF) arasında uzun illərdir ki, əməkdaşlıq əlaqələri mövcuddur. Hələ 2016-cı ildə BAMF-ın təşəbbüsü ilə prof. Məhəmməd Yunusun ölkəmizə səfəri reallaşdırılmış, o, ölkə prezidenti İlham Əliyev tərəfindən rəsmi olaraq qəbul edilmiş, daha sonra UNEC-də Yunus Sosial Biznes Mərkəzinin əsası qoyulmuş, ADA Universitetində geniş tərkibdə mühazirəsi təşkil edilmişdir. BAMF-ın prezidenti Umud Mirzəyev özü və təşkilatı adından Yunus Mərkəzinin təşəbbüsü ilə COVID-19 peyvəndlərinin bütün dünyada hər kəsə əlçatan olması üçün çağırışa imza atıb.
Qeyd edək ki, Nobel Sülh Mükafatı laureatı Prof. Məhəmməd Yunus Amerika Konqresinin Azadlıq Medalına layiq görülən 12 nəfərdən biridir. O, dünya mikromaliyyəsinin atası hesab olunur. 2006-cı ildə Məhəmməd Yunus və onun yaratdığı Grameen Bankı milyonlarla insanı regiondakı münaqişələrin əsas səbəblərindən biri olan yoxsulluqdan xilas etdiyi üçün Nobel Sülh Mükafatına layiq görülüb. BMT –nin dünyanın ünlü adamlarından ibarət 15 sülh çağırışçısından biridir.