Azərbaycan Sahibkar Qadınlar Birliyinin İdarə Heyəti Şimali Kipr Türk Respublikasının prezidenti ilə görüşüb.
Ednews xəbər verir ki, prezident Ersin Tatar Azərbaycanın can qardaşları olaraq Qarabağın zəfərini böyük sevinclə qarşıladıqlarını deyib.
Ersin Tatar Türkiyə Cümhuriyyəti və Azərbaycan arasındakı münasibətlərin inkişafını vurğulayaraq Kipr Türk xalqının bundan məmnunluğunu vurğulayıb.
Tatar, Azərbaycan xalqının yaşadığı haqsızlıqlara bənzər hadisələrin Rumlar vasitəsilə Kipr Türk xalqının başına gətirildiyini bildirərək Kipr Türk xalqının bu torpaqlardan köçməsi üçün edilənlərə hər zaman müqavimət göstərdiyini və dövlət qurduqlarını söyləyib.
Şimali Kipr Türk Respublikasının dünyada tanınması və inkişafı üçün çalışmağa davam edəcəklərini bildirən prezident Kipr türk xalqı ilə Azərbaycan xalqının eyni millətin övladları olduğunu deyib. O, bu zaman “bir millət, üç dövlət” ifadələrini xüsusi vurğulayıb.
ŞKTC-nın bir dövlət üçün lazım olan bütün funksiyalara malik olduğunu deyən Tatar, Türkiyə Cümhuriyyətinin Kipr Türk dövlətini rəsmi və siyasi olaraq tanımasının əhəmiyyəti məsələsinə də toxunub.
Şərqi Aralıq dənizində türk millətinin milli maraqları baxımından ŞKTC-nin mühümlüyünü vurğulayan Prezident gələcəkdə də Azərbaycanın dəstəyinin və qarşılıqlı əlaqələrinin daha da inkişaf etdirilməsi ilə bağlı arzularını bölüşüb.
Azərbaycan Sahibkar Qadınlar Birliyinin İdarə Heyətinin sədri Səkinə Babayeva Kipr türk xalqı ilə bir millət, üç dövlət kimi gördükləri Azərbaycan xalqının qarşılıqlı, mədəni əlaqələrinin inkişafı istiqamətində atılan addımların əhəmiyyətini dilə gətirib. Səkinə Babayeva ŞKTC-də olmaqdan məmnun olduqlarını ifadə edərək, onlara təşəkkür edib.
Prezident Ersin Tatarın xanımı Sibel Tatar Azərbaycan Sahibkar Qadınlar Birliyinin İdarə Heyətinin sədri Səkinə Babayevaya “Kıbrıs Öncül Türk Qadınları” kitabını hədiyyə edib.