Dünyada bahalaşma tendensiyası sürətlə davam etməkdədir. Əsas qida məhsullarının qiymət artımı demək olar ki, insanları çox ağır duruma salır.
Artan qiymətlər, boşalan ciblər...
Dünyada artım axarına Azərbaycan da məcbur şəkildə qoşulmaq məcburiyyətində qalıb. Çünki ölkənin daxili bazarı idxaldan asılı vəziyyətdədir.
Elə bu səbəbdən də ölkə daxilində son zamanlar bir sıra məhsulların, xüsusilə ərzaq və qida məhsullarının qiymətlərinin sürətli artımı müşahidə edilir. Hər bir ölkədə olduğu kimi Azərbaycanda da inflyasiya sosial cəhətdən həssas olan, orta və aşağı gəlirli şəxslərin və ailələrin rifahına mənfi təsir edir. Bu kimi hallar gündəlik tələbat məhsullarına ehtiyacı olan əhali arasında artıq ciddi narahatçılıq doğurub.
Məsələ ilə bağlı Ednews-a açıqlamasında Milli Məclisin deputatı Vahid Əhmədov ölkədə inlfyasiyanın artmasının səbəbləri barədə məlumat verərkən dövlət tərəfindən lazımi tədbirlərin görülməsini zəruri hesab edib.
“Bildiyimiz kimi, Azərbaycan Nazirlər Kabinetinin anti-inflyasiya tədbirləri haqqında qərarı var. Hesab edirəm ki, bu qərara əsasən İqtisadiyyat Nazirliyi yanında Antiinhisar Xidməti tərəfindən süni qiymət artımının qarşısının alınması üçün ciddi monitorinqlər həyata keçirilməlidir. Ölkəmizdə qiymətlərin süni artımı kifayyət qədər müşahidə edilir. Buna görə də müxtəlif bölgələrdə bu kimi qanunsuz hallara və əməllərə imkan verməmək üçün monitorinqləri çoxaltmaq lazımdır. Antiinhisar Xidməti bu istiqamətdə daha çevik işləməlidir. Eyni zamanda sahibkarlar da başa düşməlidirlər ki, yaxın zamanda dünya miqyasında ərzaq qıtlığının baş verməsi gözlənilir. Onların qanunsuz addımları ölkəmizdə ciddi problemlərə gətirib çıxara bilər”.
Deputat, həmçinin inflyasiyanın artmasının digər səbəbini xaricdən idxal olunan məhsullar ilə bağlayıb.
“Xarici ölkələrdən kifayət qədər ərzaq məhsulları, dərmanlar və gündəlik tələb olunan mallar idxal edirik. Rusiya-Ukrayna müharibəsi və enerji böhranı ilə əlaqədar olaraq həmin ölkələrdə məhsulların və malların qiymətləri yüksək səviyyəyə qalxıb. Bu da ölkəmizin daxili bazarındakı vəziyyətə təsir edir. Hazırda Azərbaycanda inflyasiya 13 % - ə yaxındır. Gələn ilin dövlət büdcəsində bu rəqəmin 6.9% olması gözlənilir. Düzdür, bu rəqəm mübahisə mövzusu da ola bilər. Çünki 2022-ci ilin əvvəlində inflyasiyanın 4% olacağını hesab edirdik, ancaq dövlət büdcəsi məsələlərinə baxılanda bəzi səbəblərdən dolayı bu rəqəmin 13.5 % olmasına qərar verdik”.
Sonda Vahid Əhmədov ərzaq məhsulları və dərmanlar üzərində tətbiq olunan əlavə dəyər vergisinin 1 və ya 2 % -ə endirilməsini, gömrük rüsumlarında isə ƏDV-nin 18%-dən sıfıra endirilməsini təklif edib.
Yunis Abdullayev