Bu gün dünyanın 56%-i (təxminən 4,4 milyard insan) şəhərlərdə yaşayır. Bu tendensiyanın davam edəcəyi və 2050-ci ilə qədər hər 10 nəfərdən 7-nin şəhərlərdə yaşayacağı proqnozlaşdırılır. Axının çox olduğu bu şəhərləri və onun əhalisini dəstəkləmək üçün keyfiyyətli ictimai nəqliyyat sisteminə ehtiyac var.
Ednews dünyanın ən yaxşı ictimai nəqliyyat sisteminə malik olan şəhərlərini təqdim edir.
Londonun yeraltı nəqliyyat sistemi
Dünyanın ən məşhur ictimai nəqliyyat sistemlərindən biri məhz Londondadır və Bukingemşir, Esseks və Hertfordşir əyalətlərinin bir hissəsinə də xidmət edir. Dünyanın ilk yeraltı metrosu da 1863-cü ildə Londonda tikilib. Hazırda 272 stansiyası olan bu tranzit sistemi gündəlik təxminən 1.8 milyon, illik 296 milyon sərnişinə xidmət göstərir.
Sinqapur MRT (kütləvi sürətli tranzit)
Sinqapurun Kütləvi Sürətli Tranziti dünyada ən yüksək müştəri məmnuniyyətinə malik nəqliyyat sistemidir. Sərnişinlərin 86%-i onun xidmətlərindən razıdır. 134 stansiyası olan tranzit sistemi 2019-cu ilin araşdırmasına əsasən günlük 3.4 milyon, illik isə 1.2 milyard sərnişin qəbul edir. Kütləvi Sürətli Tranzit həmçinin su istehlakının azaldılması və tullantıların təkrar emalı daxil olmaqla, Sinqapurun davamlılıq standartlarını əhatə edir.
Nyu York tranziti
Nyu-York cəmi 472 stansiya ilə dünyanın ən böyük metro sisteminə ev sahibliyi edir. Bu şəhərdə nəqliyyat avtobus, yeraltı metro və metrobusdan ibarətdir. Nyu York əhalisinin 56%-dən çoxu ictimai nəqliyyat vasitələrindən istifadə edir və əksəriyyəti xidmətdən razıdır.
Hon Konq MRT (kütləvi sürətli tranzit)
Dünyanın ən qabaqcıl ictimai nəqliyyat sistemlərindən biri Honq Konq adasını, Koulunu, Honkonqun xüsusi inzibati rayonlarının üçdə bir hissəsini əhatə edən Yeni əraziləri və Lantau adasını birləşdirən Kütləvi Tranzit Dəmiryoludur. Qatarlar hər 2-4 dəqiqədən bir işləyir. Burada 70-dən çox stansiyadan ibarət 11 xətt var. Hər bir stansiya sərnişinlərə pulsuz Wi-Fi və kondisionerlər təklif edir və əksər stansiyalara ictimai vanna otağı, mağazalar, banklar və yemək stendləri daxildir.
Berlin metropoliteni
Berlin metropoliteni dünyanın ən böyük metro sistemlərindən biridir və etibarlılığı ilə tanınır. Pik saatlarda qatarlar 5 dəqiqədən çox olmayan fasilələrlə hərəkət edir. Onun 10 xətti təxminən 146 km uzunluğunda 173 stansiyadan keçir. Digər ictimai nəqliyyat sistemlərindən fərqli olaraq qatara daxil olmaq üçün turniket yoxdur. Bunun əvəzinə, şərəf sistemi tətbiq olunur. Ancaq etibarlı bir biletiniz olmadan tutulsanız, yüksək cərimə ödəməli olacaqsınız.
Tokio metrosu
Tokio metrosu 193 mil (təxminən 311 km) məsafəni əhatə edir və gündəlik orta hesabla 7 milyon sərnişin qəbul edir. Metro o qədər etibarlıdır ki, hətta Yaponiyada bəzi şirkətlər işə gecikdiyiniz və ictimai nəqliyyatı günahlandırdığınız təqdirdə stansiyadan “Gecikmə sertifikatı” tələb edir! Əksər stansiyalarda pulsuz Wi-Fi də mövcuddur.
Mehri Ağayeva
.jpeg)
