Beynəlxalq insan haqları təşkilatları İranda edam hallarının artması barədə statistika dərc edib.
Ednews xəbər verir ki, “Amnesty İnternational” və İran İnsan Haqları Təşkilatı “Abdorrahman Boroumand Center”in hesabatlarına əsasən, bu ilin yanvar-fevral ayları ərzində İran hakimiyyəti tərəfindən 94 nəfər edama məhkum edilib.
Bildirilib ki, bu rəqəm ötən ilin eyni dövrü ilə müqayisədə edamların sayında kəskin artım olduğunu göstərir.
Hesabatlarda qeyd olunub ki, hökumət cinsi zorakılıq və digər işgəncələr tətbiq etməklə məhbusları yalan ifadə verməyə məcbur edir.
Adı çəkilən təşkilatlar İran hökuməti tərəfindən təqib olunan azlıqlara qarşı ölüm cəzasının tətbiqinin artması ilə bağlı narahatlıq ifadə edib.
“İlin əvvəlindən İran hakimiyyəti keçirdiyi ədalətsiz məhkəmələrdən sonra ərəb azlıqların məskunlaşdığı Əhvaz bölgəsindən ən azı bir nəfəri, ümumilikdə isə 14 kürd və 13 bəlucini edam edib, 12 nəfər barədə isə edam hökmü verilib. İran rejimi edamlarla etnik azlıqlar üzərində təzyiqini artırır”, deyə, bəyanatda vurğulanıb.
İnsan haqları aktivistləri qeyd edirlər ki, edamlar etnik azlıqlarla yanaşı, həm də, ölkədəki müxalif qrupları qorxutmaq üçün rejimin seçdiyi üsuldur.
Törə Zeynallı