Yüzlərlə suriyalı bir neçə ərəb ölkəsinin prezident Bəşər Əsəd rejimi ilə əlaqələrini bərpa etməsinə etiraz əlaməti olaraq nümayiş keçirib.
Ednews euronews-a istinadən xəbər verir ki, İdlibdə keçirilən nümayişlərə 12 ildir davam edən müharibə nəticəsində ölkənin digər əyalətlərindən didərgin düşən və orada məskunlaşan suriyalılar da qatılıb. Onlar bildiriblər ki, ərəb ölkələri cinayətkar rejimlə əlaqələrini normallaşdırmaqla Əsəd hakimiyyətini dəstəkləmiş olurlar.
“Biz cinayətkar rejimlə münasibətlərin yumşaldılması fikrini qəti şəkildə rədd edirik. Bu addımla siz Əsədi qazanmış, Suriya xalqını isə itirmiş olacaqsınız”, - etirazçılar öz nümayişlərində bildirib.
Suriyada 2011-ci ildə başlayan və qanlı müharibəyə çevrilən etirazlardan sonra Səudiyyə Ərəbistanı başda olmaqla bir neçə ərəb ölkəsi Dəməşqlə diplomatik əlaqələrini kəsib.
Buna baxmayaraq, fevralın 6-da Türkiyə və Suriyada minlərlə insanın həyatına son qoyan dağıdıcı zəlzələ zamanı ərəb ölkələrinin suriya xalqına humanitar yardımlar göstərməsi rəsmi Dəməşqlə diplomatik əlaqələrin bərpasına zəmin yaradıb.
Həmçinin, bu ilin aprelində doqquz ərəb ölkəsinin diplomatları Suriyanın diplomatik təcridinə son qoyulmasını müzakirə etmək üçün Səudiyyə Ərəbistanında bir araya gəlib. Suriya Xarici İşlər naziri Feysəl Əl-Miqdad isə diplomatik səyləri davam etdirmək məqsədilə Əlcəzair, Tunis və Misirə səfər edib.
Törə Zeynal