“Belə vacib seçkidə qarşılaşdığımız vəziyyəti təhlil edib dəyərləndirmək lazımdır. Keçmişdə də Türkiyədə gördüyümüz təhdidlər, şantaj... Beynəlxalq agent xidmətləri tərəfindən təqdim edilən görüntülər... Bütün bunlar əvvəllər də yaşanmışdı. Siyasi partiya sədri belə şantaj videoları ilə sədr oldu. Mərhum Dəniz Baykalın görüntüləri ilə namizəd oldu. Partiya sədrliyinə namizəd olmayacağam demişdi, amma əksini etdi”.
Ednews xəbər verir ki, bu sözləri Türkiyənin Daxili İşlər naziri Süleyman Soylu prezident seçkilərinə namizəd Məhərrəm İncənin öz namizədliyini geri çəkməsi ilə bağlı CNN Türk-ə verdiyi müsahibəsində açıqlayıb.
Canlı yayımda sualları cavablandıran Soylu İncəyə qarşı aparılan qarayaxma kampaniyasının xarici qüvvələrin çirkin əməli olduğunu dilə gətirib. O, Amerika Birləşmiş Ştatlarının Türkiyənin daxili işlərinə qarışmaqdan əl çəkmədiyini ifadə edib.
“ABŞ əvvəldən seçkilərə müdaxilə edir. Bayden açıqlamasında bildirib ki, 2016-cı ildə çevrilişlə məqsədimizə nail ola bilmədik, bu dəfə çevrilişlə yox, seçki ilə edəcəyik. Məhərrəm İncə əvvəllər CHP-nin (Cümhuriyyət Xalq Partiyası) namizədi idi, o geri çəkilsə, ona gedən səsləri alacağıq. CHP-nin aldığı səslərin əhəmiyyətli hissəsi artıq ora yönəlib. Digər səslər də müxalif səslərdir, hesablanmayacaq. Kılıçdaroğlunu bəyənməyənlər səslərini başqalarına verir. FETÖ hələ də fəaliyyətdədir. Prezident seçkilərinə gedən yolda bir namizədə qarşı çirkin kampaniya aparılır. İnsanlar da bunu görürlər. Burada açıq-aydın təxribat olduğunu görmək olar”.
Türkiyəli nazir “Məmləkət” partiyasının sədri M.İncənin məruz qaldığı hücumun FETÖ və ABŞ qüvvələrinin kirli oyunu olduğuna işarə edib:
“Kılıçdaroğlu əlindəki görüntülərin real olmadığını dedi. Həmin görüntüləri bizə göndərsəydi, lazımi təhqiqatı aparardıq. Siyasəti çox kirlədiblər. Hər məsələni gündəmə gətirirlər. İncənin video görüntüləri də xarici profillərdən göndərilib. Uçan quş da bilir ki, ABŞ bu ölkədə 10 ildən bir çevrilişə əl atır. Bu seçkilərdə İncə hücuma məruz qaldı, bunun kim tərəfindən edildiyi bəllidir. Hadisəni törədən FETÖ və ABŞ-dır”.
Nazir əlavə edib ki, seçkilərdəki bütün namizədlərin təhlükəsizliyini qorumaq və kibercinayətkarlıqla mübarizə aparmaq üçün ciddi tədbirlər görülür:
“Bütün proseslə bağlı kibercinayətkalıq üzrə departamentimizdə bu hücumlara qarşı tədbirlər görürük. Ən çox hücuma məruz qalan, təhqir olunanlardan biriyəm. Bunun böyük bir hissəsi xarici hesablardan edilir. Onları ölkə daxilində tapıb üzə çıxarırıq. Aşkarladığımız üçün də Türkiyə xaricində bunu edirlər. Bütün namizədlərin təhlükəsizliyini təmin etmək üçün tədbirlər görürük”.
Törə Zeynal
.jpeg)
