Harvard Tibb Məktəbinə bağışlanan bədən hissələrini oğurlamaq və satmaqda ittiham olunan beş şübhəli arasında 55 yaşlı Sedrik Lodc da var.
Ednews xəbər verir ki, federal prokurorluğun məlumatına görə, Harvard Tibb Məktəbinin meyitxanasının keçmiş müdiri, böyük münsiflər heyəti tərəfindən məktəbə bağışlanan meyitlərin bədən hissələrini oğurlamaq və satmaqda ittiham olunan beş nəfərdən biri olub.
Mayın 6-da işindən qovulan 55 yaşlı Sedrik Lodc və digər müttəhimlər təxminən 2018-ci ildən 2022-ci ilə qədər qara bazarda bədən hissələrinin satışını həyata keçirməkdə günahlandırılıblar. Bu barədə çərşənbə günü ABŞ-ın Pensilvaniya ştatının Orta Dairəsi üzrə Prokurorluğu məlumat yayıb.
Prokurorluqdan bildiriblər ki, 1995-ci ildə Massaçusets ştatının Boston şəhərində Harvard tərəfindən işə götürülən Lodc bəzən potensial alıcıları meyitləri yoxlamaq və hansı hissələri alacağını seçmək üçün məktəbin meyitxanasına buraxırmış. Prokurorluğun sözlərinə görə, alıcılar əsasən bədən hissələrini yenidən satışa çıxarırmışlar.
Səlahiyyətlilərin dediyinə görə, Lodce bəzən bədən hissələrini - başlar, beyinlər, dəri və sümüklər də daxil olmaqla - onları 63 yaşlı həyat yoldaşı Denislə yaşadığı evə aparır və bəzi hissələri isə poçt vasitəsilə alıcılarına çatdırırmış.
Harvard Tibb Məktəbinə bağışlanan cəsədləe təhsil, tədris və ya tədqiqat məqsədləri üçün istifadə olunur. Onlara ehtiyac qalmadıqdan sonra cəsədlər adətən yandırılır və külləri donorun ailəsinə qaytarılır və ya qəbiristanlıqda basdırılır.
Prokurorluğun dediyinə görə, altıncı şəxs daha əvvəl Arkanzasda işlədiyi meyitxanadan bədən hissələrini oğurlamaqda şübhəli bilinərək eyni istintaqda ittiham olunub.
ABC News-un Federal Təhqiqat Bürosu-na istinadən verdiyi məlumata görə, çərşənbə günü FTB tərəfindən həbs edilən Lodca və Lodcanın həyat yoldaşı da daxil olmaqla, ittiham olunan digər şəxslərin qanuni təmsilçiliyi olub-olmadığı dərhal məlum olmayıb.
Harvard Tibb Fakültəsinin dekanı Corc Daley çərşənbə günü məktəb ictimaiyyətinə verdiyi açıqlamada "bizim kampusumuzda belə narahatedici bir hadisənin baş verə biləcəyini öyrəndikdən sonra dəhşətə gəldik" deyə bildirib.
Harvardın media ilə əlaqələr ofisi cinayət təhqiqatına istinad edərək əlavə məlumat verə bilməyəcəyini bildirib.
Ülviyyə Şahin
.jpeg)
