2024-cü ildə İspaniyadan İngiltərəyə qədər Avropanın məşhur turistik yerlərində tətbiq olunacaq turizm vergilərinin məqsədi turist sıxlığının qarşısını almaq və Covid-19 epidemiyasının yaratdığı iqtisadi təsirləri azaltmaqdır.
Ednews gazeteoksijen.com-a istinadən xəbər verir ki, turistlərin bir ölkəyə və ya şəhərə getməsi üçün ödədikləri əlavə ödəniş olan turizm vergisi Avropada geniş şəkildə tətbiq edilir .
Ümumilikdə Avropa ölkələrində yerləşmə haqlarına daxil olan bu vergi, sözügedən şəhərdə neçə gün qalacağınıza, şəhərin populyarlığına, mövsümə və otelin keyfiyyətinə görə dəyişə bilər.
Turizm vergiləri turist sıxlığının qarşısını almaq, şəhərin infrastruktur və təmizlik kimi ehtiyaclarını yaxşılaşdırmaq və Covid-19 epidemiyasının yaratdığı iqtisadi təsirləri azaltmaq məqsədi daşıyır.
Fransada otel hesabına daxil olan və ziyarət edilən şəhərə görə dəyişən, adambaşı gecəlik 20 sentdən 4 avroya qədər olan turist vergisi artırılıb. Yeni tənzimləmə ilə 2024-cü il Olimpiya Oyunlarına ev sahibliyi edəcək Fransada vergi məbləği yaşayış növünə görə gecəlik 0,75 Avro ilə 15 Avro arasında dəyişəcək.
Venesiyada giriş haqqını ödəməyən turistlər şəhərə daxil ola bilməyəcək. Avropanın turistlərin ən çox seçdiyi yerlərdən biri olan İtaliyanın Venesiyasını bir günlük ziyarət edən turistlərdən 5 Avro alınacaq. Yaz-yay mövsümlərində həyata keçirilməsi planlaşdırılan yeni tənzimləmə toplanacaq turizm vergisi ilə şəhərdə sıxlığı azaltmaq, daha uzun səfərləri təşviq etmək və rayon sakinlərinin həyat keyfiyyətini yaxşılaşdırmaq məqsədi daşıyır.
Xəyal Ramiz
