Ekvador 200 milyon dollarlıq yeni texnika müqabilində ABŞ-a köhnə rus hərbi texnikası satmaq qərarına gəlib. Bunun üzərinə yanvarın 3-də Rusiya dünyanın qabaqcıl banan istehsalçısı Ekvadorda 5 şirkətin banan idxalına qadağa qoyub.

Ednews  birgun.net-ə istinadən xəbər verir ki, Cənubi Amerika ölkəsi Ekvadorun keçən ay “yeni hərbi texnika müqabilində ABŞ-a köhnə rus hərbi texnikası göndərmək” qərarından sonra Ekvador və Rusiya arasında diplomatik gərginlik dünyanın aparıcı banan ixracatçısı olan ölkənin ticarətini təhdid edir.

Yanvarın əvvəlində Canela Radio Stansiyasına verdiyi açıqlamada Ekvador Prezidenti Daniel Noboa təxminən 200 milyon dollar dəyərində yeni hərbi texnika qarşılığında ölkəsinin köhnə rus hərbi texnikasını ABŞ-a satacaqlarını və razılaşmanın son şəklini alacağını açıqlamışdı. 

Rio Times-ın məlumatına görə, ABŞ-a veriləcək avadanlıqlar arasında Rusiyanın 6 hərbi helikopteri və 12 raket buraxılış sistemi var.

Rusiya isə Ekvadorun onların icazəsi olmadan üçüncü tərəfə hərbi texnika sata bilməyəcəyini bildirən müqaviləni pozduğunu, avadanlıqların “metal qırıntısı” olduğu halda ABŞ-ın buna ehtiyacı olmadığını bildirib.

Nəhayət, Rusiyanın Heyvan və Bitki Sağlamlığına Nəzarət Təşkilatı yanvarın 3-də daha əvvəl Ekvadordan gətirilən bananda xəstəlik aşkarlandığını və bu ölkədəki 5 firmanın banan idxalına qadağa qoyduqlarını açıqlayıb.

Xəyal Ramiz