Danimarkanın baş naziri Frederiksen ötən ay ölkəsinin ən böyük hərbi birləşməsinə baş çəkib

Ednews bbc.com-a istinadən xəbər verir ki, Danimarka qadınları ilk dəfə məcburi hərbi xidmətə cəlb etməyi və hərbi xidmət müddətini uzatmağı planlaşdırdığını açıqlayıb.

Danimarkanın baş naziri Mette Frederiksen, "Biz müharibə istədiyimiz üçün deyil, müharibədən qorunmaq istədiyimiz üçün silahlandırırıq" deyə bildirib.

Danimarka hökuməti yaxın 5 ildə müdafiə büdcəsini 6 milyard dollar artıraraq NATO-nun xərc hədəflərinə çatmaq istədiyini açıqlayıb. Rusiyanın 2022-ci ilin fevralında Ukraynanı işğal etməsindən sonra Avropada hərbi xərclər artıb.

Ötən gün yeni planları açıqlayan Danimarkanın Baş naziri Frederiksen əlavə etdi ki, bu, "tam gender bərabərliyini təmin edəcək".

Danimarkada qadınlar yalnız könüllü olaraq orduya qoşula bilərlər. 18 yaşdan yuxarı kişilər üçün hərbi xidmət məcburidir.

Vicdanına görə hərbi xidmətdən imtina edənlərə mülki xidmətlə məşğul olmaq imkanı da təklif olunur. Plana görə, qadınlar üçün 2026-cı ildən məcburi hərbi xidmət başlayacaq. Danimarka Norveç və İsveçdən sonra bunu edən üçüncü Avropa ölkəsi olacaq. Hazırda dörd ay olan hərbi xidmət müddəti kişilər və qadınlar üçün 11 aya çatdırılacaq.

Ötən il hərbi xidmətə gedən 4700 nəfərin təxminən dörddə biri qadınlardır.

Altı milyon əhalisi olan ölkədə 9 mini peşəkar olmaqla 20 min əsgər var.

Ümumi daxili məhsulunun 1,4 faizini müdafiəyə xərcləyən Kopenhagen hökuməti bunu NATO qaydası olan 2 faizə çatdıracağını da açıqladı.

Keçən il Danimarka Parlamenti müdafiə xərclərini dəstəkləmək üçün yazda rəsmi tətili ləğv etdi.

Ukraynanın ən böyük dəstəkçilərindən biri olan Danimarka Kiyevə F-16 pilotlarının təlimi, eləcə də maliyyə və qabaqcıl silah yardımı edir.

Xəyal Ramiz