Dünya Bankının İcraçı Direktorlar Şurası qadınların və gənclərin Türkiyədə yaşıl keçidin yaratdığı məşğulluq imkanlarına və iqtisadi imkanlara çıxışına kömək etmək məqsədi ilə 400 milyon ABŞ dolları məbləğində maliyyələşməni təsdiqləyib.

Ednews Dünya Bankının verdiyi açıqlamaya istinadən xəbər verir ki, Türkiyə Sosial İnklüziv Yaşıl Çevrilmə Layihəsi qadın və gənclərə məxsus mikro, kiçik və orta müəssisələrin (MSME) maliyyəyə çıxışını, eləcə də qadınların və gənclərin yaradılan iş yerlərinə çıxışını asanlaşdıracaq. 

Bankın İcraçı Direktorlar Şurası, həmçinin təmiz texnologiyalar və proseslərin tətbiqi yolu ilə istixana qazı emissiyalarını azaltmaq üçün seçilmiş sektorları dəstəkləmək məqsədi daşıyan 416 milyon ABŞ dolları dəyərində olan Türkiyə Sənaye Emissiyalarının Azaldılması Layihəsini də təsdiqləyib.

Dünya Bankının Türkiyə üzrə Direktoru Humberto Lopez təsdiqlənmiş layihələrlə bağlı açıqlamasında bunları vurğuladı: Türkiyə özü ilə yeni imkanlar gətirəcək iddialı yaşıl transformasiya proqramına iqtisadi miqyasda yanaşma tətbiq edir. Dünya Bankı Türkiyənin bu məsələ ilə bağlı öhdəliyini alqışlayır və yaşıl keçidin faydalarının xüsusilə qadınlar və gənclər üçün ədalətli və əhatəli olmasını təmin etmək üçün səyləri dəstəkləməkdən məmnundur.

Xəyal Ramiz