Litvanın Sosial Demokrat Partiyası bazar günü keçirilən parlament seçkilərinin ikinci turunda qələbə qazanıb və hakim koalisiya formalaşdırmağı planlaşdırır. Xatırladaq ki, iki həftə əvvəl keçirilən birinci turda da partiya birinci yeri tutmuşdu.
Litvanın Mərkəzi Seçki Komissiyasının məlumatına görə, sosial-demokratlar hər iki turun nəticələrinə əsasən 141 yerlik parlamentdə 52 yer qazana bilib. Son illərdə müxalifətdə olan partiya "Litva naminə" və Kəndlilər və Yaşıllar Partiyası ilə üçpartiyalı koalisiya yaratmağı düşünür.
Hazırda hakimiyyətdə olan Mühafizəkarlar partiyası və "Litva Xristian Demokratları" partiyasından ibarət olan "Vətən" Bloku isə 28 yer qazanıb. Blokun lideri Gabrielyus Landsberxis sosial-demokratları qələbə münasibətilə təbrik edib :
"Həqiqətən də uğurlu nəticədir. Sizə məsuliyyətli hökumət, həmçinin məsuliyyətli yanaşma arzulayıram, və şübhə etmirəm ki, əlinizdən gələni edəcəksiniz" .
Sosial Demokrat Partiyasının lideri və Avropa Parlamenti üzvü Vilija Blinkeviçiute partiya qərargahında güllər və alqışlarla qarşılanıb. O isə öz növbəsində Litva vətəndaşlarına dəstəyə görə təşəkkür edib. Seçkinin nəticələrinin ona bağışladığı təəssürat barəsində isə Blinkeviçiute bunları deyib: "Seçki nəticələri göstərir ki, Litva xalqı dəyişiklik istəyir, onlar tamamilə fərqli hökumətə ehtiyac duyurlar," deyə o bildirib.
Blinkeviçiutenin Avropa Parlamentindəki vəzifəsindən ayrılaraq Litva hökumətinə rəhbərlik etməsi gözlənilir, amma o, jurnalistlərin suallarına təmkinlə cavab verir. “Biz bunu partiyada müzakirə edəcəyik. Bütün lehinə və əleyhinə olan amilləri ölçəcəyik, hər şeyi nəzərə alaraq qərar qəbul edəcəyik” deyə o əlavə edib və qərarların bu həftə ərzində veriləcəyini açıqlayıb.
Litvada hökumətin mümkün dəyişməsi barədə ilkin rəy sorğuları bunu göstərirdi ki, bu, Rusiyanın Ukraynaya qarşı genişmiqyaslı müdaxiləsindən sonra bu, Baltikyanı regionda ilk hakimiyyət dəyişikliyidir. Blinkeviçiute dəfələrlə bildirib ki, Litvanın xarici siyasəti dəyişməyəcək və Ukraynaya yardımlar hökumət üçün prioritet olaraq qalacaq.
Xatırladaq ki, AFP-yə görə Litva Ukraynaya yardım və müdafiə xərcləri üzrə lider ölkələrdən biridir. Bu il ölkə ÜDM-in 3,2%-ni müdafiəyə ayırıb ki, bu da NATO-nun tövsiyəsindən xeyli yüksəkdir.
Mənbə: BBC
