İtalyan jurnalist Sesilya Sala çərşənbə günü İran tərəfindən azad edilib və üç həftə əvvəl Tehranda reportaj səfəri zamanı həbs olunmasından sonra evinə qayıdıb.  

EDnyus bu barədə Reuters-ə istinadla xəbər verir.

İtalyan Baş naziri Corcia Meloni və xarici işlər naziri Antonio Tajani 29 yaşlı Salanı Romaya enən kimi qarşılayıblar. Bu, onun məsələsinə göstərilən siyasi əhəmiyyəti vurğulayıb.  

Sala müntəzəm jurnalist vizası ilə fəaliyyət göstərdiyi halda, 19 dekabrda İslam Respublikası qanunlarını pozmaq ittihamı ilə Tehranda saxlanılmışdı.  

O, ABŞ məhkəmə orderinə əsasən Milan şəhərində İrana dron hissələri tədarük etməkdə ittiham olunan iş adamı Məhəmməd Abedinin həbsindən üç gün sonra həbs edilmişdi. Vaşinqton həmin hissələrin 2024-cü ildə İordaniyada üç ABŞ hərbçisinin həlak olduğu hücumda istifadə edildiyini bildirir.  

İran həmin hücumda iştirakını inkar edib və Salanın həbs olunmasının Abedini İtaliyadan azad etmək məqsədilə təzyiq vasitəsi kimi istifadə edilməsi iddialarını rədd edib.  

İtaliya hökuməti bəyanat yayaraq, Salanın Tehranın Evin həbsxanasında təkadamlıq kamerada saxlandığını və onun "diplomatik və kəşfiyyat kanalları vasitəsilə aparılan intensiv işlər” nəticəsində azad edildiyini bildirib. Abedinin adı bəyanatda qeyd olunmayıb.  

Abedinin vəziyyəti  
Abedini çərşənbə günü Milan həbsxanasında qalmışdı. Məhkəmə gələn həftə onun ev dustaqlığına buraxılması üçün vəsatəti barədə qərar verəcək. Bu, onun ABŞ-a ekstradisiya məsələsindən əvvəl həyata keçirilə bilər.  
 "Mövcud vəziyyətdə Abedinin mövqeyi dəyişməz qalır", – Milan prokuroru Françeska Nanni jurnalistlərə bildirib.  

Florida görüşü  

Sala, Meloninin ABŞ-ın yeni seçilmiş prezidenti Donald Tramp ilə Floridada gözlənilməz görüşündən cəmi üç gün sonra azad edilib. Görüşün detalları açıqlanmasa da, Baş nazirin müavini Matteo Salvini, Salanın müzakirə mövzusu olduğunu təsdiqləyib.  

Salanın çalışdığı "Il Post" xəbər portalı məlumat yayıb ki, Tramp İtaliyaya İranla danışıqlar aparmağa "bir növ yaşıl işıq" yandırıb və bu məsələni hazırkı prezident Co Bayden administrasiyası ilə siyasiləşdirməyəcəyinə söz verib.  

Yüksək rütbəli bir siyasi mənbə görüşün əhəmiyyətli olduğunu və Salanın azad edilməsində mühüm rol oynadığını bildirib.  

İranda həbs dalğaları  
Son illərdə İran təhlükəsizlik qüvvələri casusluq və təhlükəsizliklə bağlı ittihamlarla onlarla xarici və ikili vətəndaşı həbs edib. Hüquq müdafiə qrupları İranı bu həbslər vasitəsilə digər ölkələrdən güzəştlər əldə etməyə çalışmaqda ittiham edir. İran bu ittihamları rədd edir.  

İran Xarici İşlər Nazirliyinin sözçüsü İsmayıl Bağai bazar günü Abedinin həbsini "girov götürmə” kimi dəyərləndirmişdi.