ABŞ İranın nüvə proqramı ilə bağlı narahatlıqları fonunda Tehrana qarşı yeni sanksiyalar elan edib.

“EDnews” xəbər verir ki, bu barədə məlumat Dövlət Departamentinin rəsmi saytında yer alıb.

Qeyd olunur ki, tədbirlər iki ölkə arasında davam edən danışıqlara baxmayaraq, tətbiq edilib.

Yeni sanksiyalar İranın "Fuya Pars Prospective Technologists" adlı təşkilatına və onun üç yüksəkvəzifəli əməkdaşına qarşı yönəlib. Rəsmi məlumatda qeyd edilir ki, həmin şirkət İranın Müdafiə İnnovasiyaları və Tədqiqatları Təşkilatı (SPND) ilə əlaqəlidir.

Sanksiyalar çərçivəsində adıçəkilən şəxslərin və təşkilatın ABŞ-dəki mümkün aktivləri dondurulur, onlarla hər hansı işgüzar münasibətlər qadağan edilir.

"İran nüvə proqramını əhəmiyyətli dərəcədə genişləndirməkdə və nüvə silahları ilə yanaşı, onların çatdırılma vasitələrinə tətbiq oluna bilən ikili təyinatlı tədqiqat və inkişaf fəaliyyətlərini davam etdirməkdə israrlıdır", - deyə ABŞ dövlət katibi Marko Rubio bəyanatda bildirib.

Rubio, həmçinin vurğulayıb ki, İran dünyada nüvə silahına malik olmayan, lakin uranı 60 faiz səviyyəsində zənginləşdirən yeganə ölkədir. Bu isə 2015-ci ildə imzalanmış nüvə sazişində müəyyən edilmiş 3.67 faizlik həddi xeyli aşır.

Xatırladaq ki, mayın 11-də Omanda ABŞ və İran arasında birbaşa olmayan danışıqların dördüncü raundu başa çatıb. İran Xarici İşlər Nazirliyi bu raundu "çətin, lakin bir-birini anlamaq üçün faydalı" kimi dəyərləndirib. Növbəti görüşün yaxın zamanda keçiriləcəyi gözlənilir.

Fatimə Mərdanlı //EDnews