ABŞ-ın Kaliforniya ştatının Los-Anceles şəhərində immiqrasiya reydlərinə qarşı keçirilən etiraz aksiyaları zamanı azı 56 nəfər həbs edilib. Bu barədə "NBC" telekanalına istinadən məlumat verilir.

Los-Anceles Polis Departamentinin (LAPD) rəisi Jim McDonnell-in sözlərinə görə, təkcə dünən – iyunun 10-da 29 nəfər saxlanılıb. Departamentin Mərkəzi Şöbəsinin kapitanı Raul Jovel bildirib ki, bu gün daha 10 nəfər həbs olunub.

Eyni zamanda, Kaliforniya Şosse Patrul Xidməti əməkdaşları tərəfindən 101 saylı avtomagistralda baş verən insidentlər zamanı 17 nəfər saxlanılıb.

Kapitan Jovel qeyd edib ki, dünən gecəki saxlanmalar əsasən Edvard R. Roybal Federal Binası yaxınlığında keçirilən qanunsuz toplantının polisin xəbərdarlığına baxmayaraq davam etdirilməsi ilə bağlı olub.

Jovel əlavə edib ki, bu gün həbs edilənlər arasında bir polis zabitinə molotov kokteyli atan şəxs, habelə motosikletlə bir neçə hüquq-mühafizə əməkdaşının üzərinə sürərək onlardan birini yaralayan şəxs də var. Digər şəxslərin saxlanılma səbəbləri barədə məlumat verilməyib.

Etiraz aksiyaları ABŞ-da son vaxtlar artan immiqrasiya nəzarət tədbirlərinə qarşı təşkil olunub. İnsan haqları təşkilatları və aktivistlər immiqrasiya orqanlarının sərt metodlarına etiraz edir və federal səviyyədə daha ədalətli miqrasiya siyasəti tələb edirlər.

Fatimə Şükürova // EDnews