Kremlin mətbuat katibi Dmitri Peskov Rusiya ilə Ukrayna arasında təqdim edilmiş memorandumlara cavab mübadiləsinin yalnız birbaşa və davamlı danışıqlar çərçivəsində mümkün ola biləcəyini bəyan edib.

“EDnews” xəbər verir ki, bu barədə Peskov Rusiya KİV-ə açıqlamasında danışıb. Onun sözlərinə görə, diplomatik prosesin irəliləməsi üçün əsas şərt tərəflər arasında dialoqun yenidən bərpasıdır.

"Təbii ki, vəziyyətin necə inkişaf edəcəyindən asılı olaraq, proses ideal halda danışıqların növbəti raunduna doğru yönəlməlidir. Lakin hazırda bunun nə vaxt baş verə biləcəyi barədə konkret fikir yoxdur", – deyə Peskov vurğulayıb.
Kreml rəsmisi eyni zamanda qeyd edib ki, Rusiya tərəfi ölən Ukrayna hərbçilərinin cəsədlərinin təhvil verilməsi və hərbi əsirlərin dəyişdirilməsi ilə bağlı razılaşmaların yerinə yetirilməsinə hazırdır.

Bu açıqlama Moskva və Kiyev arasında bir müddətdir fasilə verilmiş diplomatik kanalların yenidən işə salınması ehtimalı ilə bağlı müzakirələri gücləndirib. Lakin Peskovun sözlərinə görə, hələlik danışıqların konkret tarixi və ya mexanizmi məlum deyil.

Fatimə Şükürova // EDnews