Böyük Britaniyanın XİN rəhbəri Boris Conson Suriyada humanitar karvanın bombalanmasında Rusiyanın məsuliyyət daşıdığını təsdiqləyən sübutların olduğunu deyib.
Onun sözlərinə görə, Suriyada törədilən hərbi cinayətləri beynəlxalq məhkəmədə araşdırılması üçün səbəblər var.
Bundan əvvəl Rusiya XİN rəhbəri Sergey Lavrov qeyd edib ki, Moskva sentyabrın 19-da Hələb yaxınlığında humanitar yardım karvanına hücumun hərtərəfli araşdırılmasına nail olmaq niyyətindədir.
Consonun açıqlamasına Zaxarova belə cavab verib
Londondakı Rusiya səfirliyi və Rusiyanın Xarici İşlər Nazirliyi Boris Consonun parlamentdəki çıxşına acıqlı reaksiya verib.
Rusiya səfirliyinin yazdığı tvitdə deyilir: "Siz indiyədək nəyə nail olmusunuz? Rusiya minlərlə kəndi azad edib və suriyalılara min tonlarla humanitar yardım gətirib. Bəs Britaniya nə edib?".
Rusiya səfirliyinin mətbuat katibi deyib ki, Britaniya rəsmiləri "tarixin yanlış tərəfində yer tutublar".
Moskva rəsmiləri cənab Conson-un çıxışını "çox qeyri-adi" və "məyusedici" adlandırıblar.
Rusiyanın Xarici İşlər Nazirliyinin sözçüsü Mariya Zaxarova Britaniya xarici işlər nazirinin ittihamları üçün sübutların təqdim olunmasını tələb edib.
Zaxarova cənab Consonun bəyanatlarına özünün Facebook səhifəsindən cavab yazıb.
Postda deyilir: "Belə görünür ki, Boris Conson sözdən əmələ keçib. Başqa sözlərlə o, Rusiyanı utandırmağa çalışıb. Biz doğrudan da Conson yerinə utanırıq".