Son 10 ildə Fransa vətəndaşı olan 40 minYəhudi ölkəni tərk edib.
“Eurasia Diary”nin Sputnik News-a istinadən verdiyi məlumata görə, İsrailin Yəhudi Agentliyinin açıqladığı rəqəmlərə əsasən Parisdə satirik jurnal olan “Charlie Hebdo”nun ofisinə və supermarketə edilən terror hücumlarından sonra 5 min Yəhudi ölkəni tərk edib. İsrailin Yəhudi Agentliyinin Fransadakı ofisinin rəhbəri Daniel Benhaim açıqlayıb ki, yəhudilərin ölkəni tərk etməsinin səbəbi törədilən terror hadisələrinin onları qorxuya salmasıdır.
İsrail Yəhudi Agentliyin hazırladığı statistikaya görə, ölkəni tərk edən yəhudilərin sayı 2014-ci ildə 7 min 900, 2015-ci ildə 7 min 231 nəfər olub, lakin 2016-ci ildə ölkəni tərk edən yəhudilərin sayında azalma müşahidə olunub.
İsrailin Yəhudi Agentliyinin nümayəndəsi Avi Mayer Sputnik News-a müsahibəsində açıqlayıb ki, yəhudilərin Fransadan İsrailə köçməsinin səbəbi təkcə terror qorxusu deyil, həmçinin İsrailin güclü iqtisadiyyata sahib olmasıdır. “İsraili öz dövləti kimi görməyi arzu edən yəhudiləri xoş qarşılamağı səbirsizliklə gözləyirik”-deyə Avi bildirib. Avi Mayer həmçinin onu da qeyd edib ki, Fransada 500 minlik yəhudi cəmiyyəti 2000-ci ildən bəri anti-semitik hücumlara məruz qalır.
Xatırladaq ki, 2006-ci ildə Paris ətrafındakı əyalətlərin birində yəhudi qətlə yetirilmişdir və 2012-ci ildə Fransanın Toulous bölgəsində yəhudilərə məxsus məktəbdə atışma baş vermişdir.
Yunis Abdullayev
