Bu gün müasir Azərbaycan peşəkar musiqi sənətinin və milli operasının banisi dahi bəstəkar Üzeyir Hacıbəyovun ad günüdür. O, 18 Sentyabr 1885-ci il Ağcabədidə anadan olub.

Uşaq yaşlarında ailəsi ilə birgə Şuşaya köçmüşdür. Ondan başqa ailənin bütün uşaqları Şuşada anadan olmuşdur.

Üzeyir Hacıbəyov 1880-1904-cü illərdə Qori Müəllimlər Seminariyasında təhsil almışdır. Seminariyanı bitirdikdən sonra Hacıbəyov 1904-cü ildə Cəbrayıl qəzasının Hadrut kəndinə müəllim təyin edilmişdir. Hadrut kənd məktəbində rus dili, hesab, tarix və musiqidən dərs demişdir.

1905-1907-ci illərdə isə Üzeyir Hacıbəyov Bakıya gəlmişdir. 1911-ci ildə Üzeyir Hacıbəyov musiqi təhsili almaq üçün Moskvaya getmiş, Moskva filarmonik cəmiyyəti nəzdində İlyinskinin xüsusi musiqi kursunda təhsil almışdır. Moskvadan göndərdiyi satirik hekayə və felyetonlar «İqbal» qəzetində dərc olunmuşdur. Maddi ehtiyac üzundən Hacıbəyov Moskvada musiqi təhsilini yarımçıq qoyub, Bakıya qayıtmağa məcbur olmuşdur.

Üzeyir bəyin Azərbaycan incəsənəti üçün göstərdiyi xidmətlər əvəzsiz hesab olunur. Belə ki, o, 1908-ci ildə Bakıda Hacı Zeynalabdin Tağıyevin teatrında “Leyli və Məcnun” operasını tamaşaya qoymaqla nəinki Azərbaycanda, bütün müsəlman şərqində operanın əsasını qoydu.

Üzeyir yaradıcılığında Füzuli poeziyasına çox dərin bir məhəbbət hökm sürürdü. Səməd Vurğun çox doğru olaraq Üzeyirə "Ey Füzuli şerinin bir bəstəkar qardaşı!"—deyə müraciət edirdi.

Üzeyir Hacıbəyov “Leyli və Məcnun”la yanaşı “Şeyx Sənan”, “Rüstəm və Söhrab”, “Şah Abbas və Xurşud banu”, “Əsli və Kərəm”, “Harun və Leyla” muğam operalarını bəstələmişdir.

Qeyd edək ki, Üzeyir Hacıbəyov həm də Azərbaycan Himninin bəstəkarıdır.

Ümummilli lider Heydər Əliyevin sərəncamı ilə 18 sentyabr Musiqi günü kimi qeyd olunur.