Ermənistanın sabiq müdafiə naziri, hərbi cani və hazırda parlamentdə müxalifəti təmsil edən Seyran Ohanyan jurnalistlərə geniş açıqlama verib. O, bölgədə kommunikasiyaların açılması nəticəsində Ermənistanın “daha dərin blokadaya” düşəcəyini bildirib: “Bu, özünü iqtisadi təzyiqdə (Azərbaycan tərəfindən - red.) və ən ağrılısı – Sünikin və Qekarkunikin (Zəngəzur və Göyçə - red.) demoqrafik xəritəsinin dəyişməsində göstərəcək”.
Ohanyan iddia edib ki, türklər və azərbaycanlılar iqtisadi inkişaf, əlaqələrin bərpası və s. adlarla Ermənistana axışacaq və demoqrafik durumu kökündən dəyişərək, Ermənistanın və Qarabağın gələcəyini sual altında qoyacaq.
Daha sonra Ohanyan bu gedişlə Ermənistanın “türkləşdiriləcəyini” söyləyib və noyabrın 9-da Moskvada keçiriləcəyi deyilən Azərbaycan və Ermənistan rəhbərlərinin görüşü barədə pessimist danışıb: “Artıq bu gün hakimiyyət ortaya belə bir tezis atıb ki, noyabrın 9-da keçiriləcək görüşdə yenə hansısa kapitulyasiya sənədi imzalanacaq və bu sənəd qlobal mənada, onların dediyinə görə, “regionda sülhü möhkəmləndirəcək”. “Sülh” düşmənin ərazi bütövlüyünün tanınması deməkdir, ərazi bütövlüyünün tanınması isə “artsax”ın (Qarabağın - red.) öz müqəddəratını təyin etməsinin üzərindən xətt çəkilməsi anlamı daşıyır”.
Məsələ ilə bağlı politoloq Əhməd Əlili EDNews.net-ə açıqlama verib.
Onun sözlərinə görə, Ermənistanda çox zaman bu cür vacib sənədlərin imzalanması ərəfəsində liderin kim olmasından asılı olmayaraq, ona qarşı müəyyən təzyiqlər formalaşdırılır: "Bu təzyiqlər də ilk növbədə danışıqların məzmununun açıqlanmasından ibarət olur. 1997-98-ci illərdə Levon Ter-Petrosyana qarşı da vacib sənədlərin ərəfəsində Ermənistanın daxilində və yaxud mətbuatda çıxan məqalə nəticəsində vəziyyət kifayət qədər qəlizləşdi. Nəticədə, o zamankı prezident L. Ter-Petrosyanın istefaya getməsini gördük. İndinin özündə də Ohanyanın və ya digərlərinin dediyi məqamlar imzalanacaq sülh müqaviləsinə reaksiya kimi ortaya çıxıb. Bu reaksiya Ermənistanın ziyanınadır və indiki siyasi liderliyinə qarşı bir təzyiq formalaşdırmağa çalışırlar”.
Politoloq bildirib ki, Ermənistan hal-hazırda blokadadır və kommunikasiyaların açılması ona iqtisadi, siyasi və digər imkanlar yaradacaq: “Ermənistandakı hazırki proseslərdə Ermənistan cəmiyyətini liderə qarşı qoymaq üçün bu cür tezislərdən istifadə olunur. Düşünürəm ki, demoqrafik prosesin dəyişməsi artıq gedir. Son 30 ildə biz ermənilərin sayına baxsaq, Ermənistan doğumlu ermənilərin böyük əksəriyyətinin Rusiya və digər ərazilərə köçdüyünü görürük. Ermənistan ərazisinə Suriyadan və digər ərazilərdən insanları köçürüb, onların bu ərazilərdə yaşamasını təmin etməyə çalışılır. Amma demoqrafik göstəricilər daxildə Azərbaycan və Türkiyənin xeyrinəmi dəyişəcək? Nəzərə almaq lazımdır ki, Ermənistan Azərbaycan arasında böyük sülh müqaviləsi imzalandıqdan sonra oradan qovulmuş azərbaycanlıların geri qayıtmasına nəzarət olacaq. Oradan çıxan azərbaycanlılar əgər bir ailə idilərsə, hal-hazırda artıq yeddi-səkkiz ailədirlər. İstər-istəməz Ermənistana qayıdanda biz görə bilərik ki, Ermənistan iqtisadiyyatında, demoqrafiyasında tamam yeni bir mənzərə meydana çıxacaq. İmzalanan müqavilə sadəcə bu prosesi daha da sürətləndirə bilər. Və bu məsələdə Paşinyan deyil, əvvəlki liderlər vacib rol oynayıblar”.
Ə. Əlili qeyd edib ki, Azərbaycan və Ermənistan arasında sülh sənədi hələ uzun müddət müzakirə edilməli olan sənəddir: “Hələ illər lazım olacaq ki, Azərbaycan və Ermənistan cəmiyyətlərinin bu istiqamətdə irəliləməsini təmin etmək üçün müəyyən bir nailiyyət əldə olunsun. Bu, əlbəttə ki, hər iki tərəfin cəmiyyətinin verəcəkləri qərardan asılı olacaq. Amma yaxın zamanda imzalanacaq sənəd daha çox sərhədlərin demarkasiyası və dəhlizlə bağlı olacaq ki, bu çox vacib məqamdır. Əgər Ermənistan Azərbaycan sərhədlərini tanıyacaqsa, bu özü avtomatik olaraq Qarabağın Azərbaycan tərkibində tanınması deməkdir. Düşünürəm ki, Azərbaycan olaraq Ermənistan liderinin belə bir sənədi imzalamasından böyük qazanc əldə edəcəyik. Ona görə də, ümumiyyətlə Ermənistan çalışacaq ki, bu sənədlər imzalanmasın və bu sənədlərin əleyhinə getsin. Reallıqda isə Rusiyaya bu istiqamətdə işlərin görülməsi sərf edir, Ermənistanla əlaqələrin meydana çıxması üçün ciddi cəhdlə çalışır. Düşünürəm ki, Ermənistan yalnız özü üçün sərfəli olan hər hansı bir bənd irəli sürsə belə, Rusiya çalışacaq ki, məsələ çox sürətlə həll olunsun”.
Gülnar Səlimova
Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır
6.3.4. ictimai və dövlət maraqlarının müdafiəsi