Bu yaxınlarda Vətəndaş və İnkişaf Partiyasının sədri Əli Əliyevin həbs edilməsi indiyə qədər zindan həyatı yaşayan partiya liderlərini gündəmə gətirib.
Beləliklə, EDNews indiyədək həbs həyatı yaşamış partiya liderlərinin siyahısını təqdim edir:
1. Müsavat Partiyasının sabiq başqanı, Milli Strateji Düşüncə Mərkəzinin rəhbəri İsa Qəmbər - Keçmiş spiker İsa Qəmbər 16 iyul 1993-cü ildə Milli Məclisin iclasında həbs olunub. İsa Qəmbər cəmi 1 ay məhbus həyatı yaşayıb.
2. Azərbaycan Milli İstiqlal Partiyasının (AMİP) fəxri lideri Etibar Məmmədov – O, SSRİ dövründə, 1990-cı il yanvar hadisələrindən sonra Moskvada xarici jurnalistlər üçün mətbuat konfransı keçirərkən DTK tərəfindən həbs olunub. 2004-cü ildə partiya sədrliyindən istefa verib və aktiv siyasətdən uzaqlaşıb.
3. Sabiq Daxili işlər naziri İsgəndər Həmidov - O, 17 mart 1995-ci ildə həbs olunub. Martın 31-də isə İsgəndər Həmidovun rəhbəri olduğu "Boz Qurd" Partiyasının fəaliyyəti dayandırılıb. O, 14 il müddətinə azadlıqdan məhrum edilib. 2003-cü ilin dekabrında əfv fərmanı ilə azadlığa buraxılıb.
4. Müsavat Partiyasının başqanı Arif Hacılı - A.Hacılı müxtəlif dövrlərdə məhbus həyatı yaşayıb. O, 1998-ci və 2000-ci, 2003-cü, 2011-ci illərdə həbs olunub. Cəza müddətinin əksəriyyətini çəkdikdən sonra əfv olunaraq azadlıqa buraxılıb.
5. AĞ Partiyanın sədri Tural Abbaslı – Gənc yaşlarından siyasətə qatılan bu siyasətçi ilk dəfə 2011-ci ildə həbs olunaraq 2 il 6 ay həbs cəzasına məhkum edilib.
6. Ümid Partiyasının sədri İqbal Ağazadə - 2003-cü il oktyabr hadisələrinə görə həbs olunub, 17 aylıq məhbus həyatı yaşayıb.
7. Azərbaycan Milli Dövlətçilik Partiyasının sədri Nemət Pənahlı - 2011-2016-cı illərdə silahdan və ya silah qismində istifadə edilən əşyaları tətbiq etməklə xuliqanlıq və qəsdən sağlamlığa az ağır zərər vurmaq ittihamı ilə həbsdə olub. Nemət Pənahlı 2018-ci ildə isə polisin qanuni tələbinə tabe olmamaqda təqsirli bilinib və oktyabrın 12-də Nəsimi Rayon Məhkəməsi Nemət Pənahlıya 30 sutka inzibati həbs cəzası verib.
8. Müasir Müsavat Partiyasının (MMP) sədri Hafiz Hacıyev - İndiyədək iki dəfə həbs edilib. Hafiz Hacıyevin yolu ilk dəfə həbsxanaya 1993-cü ildə düşüb. Daha sonra o, 1996-cı ildə yenidən məhbus həyatı yaşayıb. O, 3 il müddətinə azadlıqdan məhrum edilib.
9. Azərbaycan Demokrat Partiyasının sədri Sərdar Cəlaloğlu da yolu həbsxanadan keçən partiya liderlərindəndir. O, 2003-cü ildə həbs olunub. Partiya lideri 4 il 6 ay müddətinə azadlıqdan məhrum edilib.
10. Milli Dirçəliş Hərəkatı Partiyasının (MDHP) sədri Fərəc Quliyev – F. Quliyev 1995-ci ildən 2002-ci ilə kimi həbsdə olub.
11. Azərbaycan Sosial Demokrat Partiyasının (ASDP) sədri Araz Əlizadə - O, SSRİ dövründə, 1985-ci ildə həbs edilib.
12. Azərbaycan Xalq Cəbhəsi Partiyasının (AXCP) sədri Əli Kərimli - Əli Kərimli 1994-cü ildə həbs olunub. 1 ay həbsdə qalan Əli Kərimli sonradan azadlığa buraxılıb.
13. Milli Konqres Partiyasın sədri İxtiyar Şirin - 1993-cü ildə həbs olunub. O, 11 aydan sonra azadlığa buraxılıb.
14. Azərbaycan Xalq Partiyasının (AXP) sədri Pənah Hüseyn - 2003-cü ilin həbs olunub və 17 ay məhbus həyatı yaşayıb.
15. Azad Demokratlar Partiyasının sədri Sülhəddin Əkbər - 16 iyul 1993-cü ildə Milli Məclisin üzvlüyündən azad edilib və cinayət məsuliyyətinə cəlb olunub. 1 sentyabr barəsində həbs qərarı çıxarılıb.
16. REAL Partiyasının sədri İlqar Məmmədov - 2013-cü il barəsində həbs-qətimkan tədbiri seçilib. O, 7 il azadlıqdan məhrum edilib. O, 2018-ci il avqustun 13-də şərti azadlığa buraxılıb. 2020-ci ilin aprelin 23-də isə Azərbaycan Ali Məhkəməsinin Plenumu İlqar Məmmədova tam bəraət verib.
17. Vətəndaş və İnkişaf Partiyasının (VİP) sədri Əli Əliyev – 2022-ci ilin 13 yanvar tarixində 5 ay müddətinə azadlıqdan məhrum olunub.