Azərbaycan prezidenti İlham Əliyev oktyabrın 17-də Rusiyanın “Sputnik” informasiya agentliyinə verdiyi müsahibədə Dağlıq Qarabağ probleminin həlli ilə bağlı vacib fikirlər səsləndirib. Prezident Azərbaycanın ərazi bütövlüyü məsələsində Ermənistan tərəfi ilə kompromisin olmayacağını bildirib və qeyd edib ki, yerli özünüidarəçilik məsələlərində kompromis mümkündür. Əgər razılığa gəlinsə bu özünüidarə Dağlıq Qarabağ Muxtar Respublikası şəklində ola bilər.
Siyasi şərhçi Arzu Nağıyev “Eurasia Diary”yə Prezidentin Dağlıq Qarabağla bağlı səsləndirdiyi fikirləri şərh edib. Ekspert qeyd edib ki, prezidentin açıqlamasında elə bir yenilik yoxdur. Azərbaycan prezidenti hər dəfə ATƏT-in həmsədrləri ilə görüşlərində də Azərbaycanın suverenliyi çərçivəsində Qarabağ probleminin həllinin olduğunu deyib. İctimaiyyət də bunu bilir ki, ilk növbədə işğalçı ordu Azərbaycan ərazisini tərk etməlidir. Qaçqınlar öz yurd-yuvalarına, dədə-baba torpaqlarına qayıtmalıdır. Bundan sonra Dağlıq Qarabağın statusu məsələsinə qayıtmaq lazımdır”.
Politoloqun sözlərinə görə, hər hansı bir formada, istər muxtar respublika, istərsə də hansısa qurum formasında Azərbaycana tabe olmaqla bu məsələ həll edilməlidir. “Mərhələli şəkildə bu problem həll olmalıdır. Status məsələsinə gəldikdə isə, Azərbaycan ərazisində ikinci müstəqil dövlətin yaradılmasına imkan verməyəcək”.
Cənab Nağıyev, Dağlıq Qarabağda əvvəlcədən də ermənilərin kompakt yaşadığı ərazilərin olduğunu bildirib və əlavə edib ki, burada söhbət ermənilərin müstəqil dövlət yaratmaması məsələsindən gedir. “Əgər BMT Azərbaycanın ərazisini Dağlığlıq Qarabağ da daxil edilməklə təsdiq edibsə, ikinci bir müstəqil dövlətin yaradılmasından söhbət gedə bilməz. Azərbaycana tabe olmaqla hər hansı bir qurumun yaradılması ikinci plandır. Ermənilər işğal etdikləri əraziləri boşaltmamaq üçün müxtəlif oyunlar qururlar. Bundan sonra ermənilər bəhanə gətirməsinlər ki, bizi yer üzündən kimsə silmək istəyir. Bizim istədiyimiz yalnız odur ki, Azərbaycan ərazisində ikinci bir dövlət yaranmasın”.
Vüsalə Əlövsətqızı
