Rusiyanın Ukraynaya qarşı bu gün səhərə yaxın başlayan genişmiqyaslı hərbi müdaxiləsi ilə bağlı yaranmış vəziyyət, döyüş əməliyyatlarının gedişi barədə ziddiyyətli xəbərlər var.
Rusiya rəsmi təbliğatı və KİV-ləri Ukrayna ordusunun artıq darmadağın edildiyini, müqavimət göstərmədiyini, silahlarını və texnikasını atıb qaçdığını, bir çox hərbi birləşmələrin mühasirəyə alındığı haqda xəbərlər yayırlar. Ukrayna tərəfi isə bu məlumatları təsdiq etmir, təcavüzkara qarşı şiddətli müqavimət göstərildiyini bildirir.
Az əvvəl Ukrayna prezidenti Ofisinin müşaviri Aleksey Arestoviç Rusiyanın hava zərbələrinin ikinci dalğasına başladığını xəbər verib. O əlavə edib ki, yeni zərbələrin nəticələri hər halda səhər saatlarında birinci zərbələrin nəticəsindən ağır olmayacaq.
Arestoviç keçirdiyi brifinqdə deyib ki, Xarkov ətrafında hazırda ağır döyüşlər davam edir.
Ukrayna ordusunun Donbasdakı birləşmiş əməliyyat qüvvələrinin Qərargahı isə Luqansk vilayət üzərində daha bir Rusiya döyüş təyyarəsinin vurulduğunu, bunun sayca vurulan yeddinci təyyarə olduğunu bildirib. Məlumatda deyilir ki, təcavüzkar qoşunlar canlı qüvvə və texnika sarıdan da itki verməkdə davam edir.
Az əvvəl Rusiya ordusu Kiyev ətrafındakı Brovar rayonuna qanadlı raketlərlə zərbələr endirib. Bildirilir ki, hədəf Ukrayna ordusunun xüsusi təyinatlı qüvvələr Komandanlığı olub. “Bizim məlumatlarımıza görə bazanın ərazisində bir güclü partlayış baş verib, itki hazırda yoxdur, amma məlumat dəqiqləşdirilir”, - Aleksey Arestoviç bildirib.
Məlumata görə Brovara endirilən raket zərbəsinin səsi Kiyevin bütün ərazisində eşidilib.