Gündəmdən düşməyən Rusiya və Ukrayna arasındakı gərginlik insanların müharibə gedən əraziləri tərk etməsi, Rusiyaya qarşı tətbiq edilən sanksiyalar və SWİFT sistemindən çıxarılması ilə nəticələnərək bu gün də davam edir. Avropa İttifaqı (Aİ) və ABŞ da başda olmaqla, Qərbin silah dəstəyi göstərdiyi Ukrayna Rusiyanın qarşıya qoyduğu tələbləri qəbul etməyərək müstəqilliyini qorumağa çalışır.
Xatırladaq ki, Rusiyanın tələbləri NATO-nun Şərqə doğru irəliləməməsi, Ukraynanın heç vaxt NATO üzvü olmayacağına və ərazisində NATO-ya məxsus silahları yerləşdirməyəcəyinə dair öhdəlik götürməsidir.
Yayılan məlumatlarda isə yaxın zamanlarda Rusiya lideri Vladimir Putinin Ukraynadan sonra növbəti hədəfinin Moldova olacağı deyilir. Bu iddiaların yaranmasına isə Rusiyanın müttəfiqlərindən biri olan Belarus Prezidenti Aleksandr Lukaşenkonun Ukrayna müharibəsi haqqında danışarkən istifadə etdiyi xəritədə Moldovaya aid Dnestryanı bölgəsinə doğru ox çəkilmiş görüntü olub. Bu detal da yayılan iddiaların gündəmə gəlməsinə səbəb olub.
Rusiyanın bu müharibələri başlatmaqda əsas hədəfi nədir?
Bu suala cavab tapmaq məqsədilə müraciət etdiyimiz millət vəkili Elman Nəsirov Ednews-a açıqlamasında bildirib ki, hazırda gedən Rusiya ilə Qərbin müharibəsidir.
(1).jpg)
“İki tərəfin qarşıdurmasının məkanı isə Ukraynadır. Vladimir Putinin hazırda baş verən hadisələrin mahiyyətini əks etdirən 2007-ci il Münhen çıxışında anons verdiyi məsələlərin bugünkü tətbiqinin şahidi oluruq”.
Söhbət zamanı o, bildirib ki, Rusiyanın Ukrayna və Moldova da daxil olmaqla ölkələri işğal etməsi məsələsi bir qədər şişirdilir.
“Ukrayna, Moldova və digər ölkələrin Rusiya tərəfindən işğalı məsələsi bir qədər şişirdilib. Çünki Putin çıxışlarında dəfələrlə bəyan edib ki, SSRİ-nin bərpası qeyri-real və çətindir. Əgər Ukrayna neytral dövlət olacağına razılıq versəydi, bu gün baş verən müharibədən yayınmaq mümkün olardı”.
Millət vəkili çıxan xəbərlərə baxmayaraq Rusiyanın Moldovaya hücumunun baş verməyəcəyi qənaətindədir.
“Rusiya Ukrayna cəbhəsində böyük itkilər və ciddi iqtisadi nəticələrlə üzləşdiyindən Ukraynadan sonra Moldovaya hücum etməsi və s. şişirdilmiş yanaşmalardır. NATO-ya üzv olmaq niyyətində olan post sovet ölkələrinin Ukrayna müharibəsindən dərs almaları Rusiyanın hədəflərindən biridir. Rusiya digər ölkələri işğal etmək deyil, onların NATO üzvü olmalarına mane olmaq istəyir”.
Aysel Bədəlova
