“Bu təxribat Ermənistana Azərbaycanla imzalanmış sülh müqaviləsini pozmaq üçün lazımdır. Çünki Brüsseldə baş tutan görüşlərdən sonra məlum oldu ki, İrəvan və Bakı qarşıdan gələn post-münaqişə dövrünü hüquqi cəhətdən rəsmiləşdirməyə yaxınlaşır. İrəvan üçün isə sülh müqaviləsinin imzalanması Azərbaycana qarşı ərazi iddialarının tamamilə rədd edilməsi və azalan status-kvonun tanınması deməkdir”.

Bu fikirləri Ednews-a açıqlaması zamanı rusiyalı hərbi ekspert, jurnalist İqor Korotçenko səsləndirib. O, qeyd edib ki, bu bir çoxlarına, o cümlədən Ermənistanda olan revanşistlərə də sərf etmir. 

“Ona görə də Ermənistan tərəfinin törətdiyi bütün bu təxribatlar, bir tərəfdən, Azərbaycan prezidenti İlham Əliyevin irəli sürdüyü beş prinsip əsasında sülh müqaviləsinin imzalanmasının yaxın perspektivlərini mümkünsüz etmək məqsədi daşıyır. İkinci məqsəd isə ABŞ, Fransa və Avropa Birliyinin istəyi ilə oynayaraq, regiondakı problemlərin həll edilməsini yubatmaqdır. Bu da alternativ dəhlizlərin, o cümlədən Zəngəzur dəhlizinin və Şimal-Cənub nəqliyyat dəhlizinin işə salınmasını şübhə altına alır, çünki Rusiya müstəsna olaraq, bu layihələrin həyata keçirilməsində böyük maraq göstərir”. 

İ.Korotçenko həmçinin qeyd edib ki, erməni revanşistləri Qərb ölkələrinə, əsas ABŞ və Fransaya arxalanaraq, sərhəddə qarşıdurma yaradırlar. 

“Ermənistanda revanşistlər kifayət qədər böyük nüfuza sahibidirlər. Paşinyan sülh müqaviləsi istəmir, amma vəziyyət və şərait onun bu yola getməyə vadar edir. Ancaq o, hər an geri dönə bilər. Həm də regionda sakitlik Azərbaycanın ərazi bütövlüyünün bərpası, separatçı rejimin aradan qaldırılması və Ermənistanın Azərbaycana qarşı ərazi iddialarından qanuni və rəsmi şəkildə imtina etməsi deməkdir. Buna görə də həm xarici, həm də regional marağı olan tərəflər var. Erməni lobbisi dünyada müstəqil struktur və böyük qüvvəyə sahibdir. Onlar sülh müqaviləsinin bağlanmasının qarşısını almaq və Azərbaycan xalqının başına gətirdikləri faciələri ört-basdır etmək istəyirlər”.

Rəna Mürşüd