Sudanda general-leytenant Əbdülfəttah əl-Burhanın rəhbərlik etdiyi ordu qüvvələri ilə onun keçmiş müttəfiqi Məhəmməd Həmdan Daqaloya ("Həmidti" ləqəbli) sadiq hərbiləşdirilmiş Çevik Dəstək Qüvvələri arasında toqquşmalar davam edir. İki general ölkənin düşdüyü böhranlı vəziyyətdə bir-birini ittiham edir. Sudan ordusu və Çevik Dəstək Qüvvələri paytaxt Xartumda qarşılıqlı atışmaların davam etməsi fonunda beynəlxalq güclər tərəfindən 24 saatlıq atəşkəsi pozmaqda ittiham edilib.
Afrika ölkəsində davam edən ağır vəziyyət və bunun gözlənilən siyasi nəticələrini sudanlı politoloq Tahir Əl Mutəsim Ednews-a özəl olaraq şərh edib. O, ölkədəki iki hərbi qanad arasında sudanlıların düşdüyü böhranın siyasi keçid prosesinə və bu silahlı münaqişənin qonşu ölkələrə ola biləcək təsirləri barədə proqnozlarını bölüşüb.
“Təxminlərimə əsasən deyə bilərəm ki, Sudan ordusunun imkanları böyükdür və ölkə yaşadığı bu böhranlı vəziyyətdən öz gücü hesabına çıxa biləcək. Gözlənilən ssenari budur ki, Sudan ordusu bu döyüşdə qalib gələ bilər, lakin Həmidti (Məhəmməd Həmdan Daqalo – Çevik Dəstək Qüvvələrin rəhbəri) Sudanda Darfura, ailəsinə və mənsub olduğu qəbiləyə nəzarət edir, bu səbəblə daxili çaxnaşmaların uzun müharibəyə çevrilə biləcəyini ehtimal edə bilərik”.
Tahir əl Mutəsim Sudan böhranının qonşu ölkələrə də təsir edəcəyini istisna etməyib:
“Şübhəsiz ki, Sudan böhranı qonşu ölkələrə də təsir edəcək. Sudanın qonşuları, xüsusən, Çad, Mərkəzi Afrika Respublikası və Liviya da bitməyən böhran içindədir. Çad Sudanla sərhədini bağlayıb. Bu ölkələrdə Həmidtini izləyən qüvvələr var. Onun ölkəsinə qayıdıb qayıtmayacağını heç kim bilə bilməz. Ölkədə davam edən böhranlı vəziyyətdə və gedən qanlı döyüşlərdə Sudanın qonşularının rolu olduğunu hələki heç kim iddia edə bilməz”.
Sudanlı analitik ölkədə davam edən gərginliyi yatırmaq üçün irəli sürən vasitəçilik təşəbbüslərinə də toxunub və bildirib ki, Afrika ölkələri bu böhranlı vəziyyəti yumşaltmaqda maraqlı olmalıdır:
“Sudan Silahlı Qüvvələrinin komandanı general leytenant Əbdülfəttah Əl-Burhan danışıqlar aparmaq istədiyini açıqlayıb. Bununla yanaşı müxtəlif beynəlxalq təşkilatlardan, eləcə də Keniya, Cənubi Sudan və Cibuti kimi ölkələrdən bir sıra təşəbbüslər var. Bizim Afrika Birliyindəki nümayəndəmiz də bu danışıqlarda iştirak edəcək. BMT Təhlükəsizlik Şurasının sessiyası keçirilib və orada Misir və Cənubi Sudanın vasitəçilik təşəbbüsü müzakirə edilib. Bütün bu təşəbbüslər Sudanın bu böhrandan çıxa bilməsi üçün imkandır”.
Törə Zeynal
