26 aprel 1986-cı il... O gün, o vaxtkı Sovet İttifaqına bağlı Ukraynanın paytaxtı Kiyevdən 130 kilometr şimalda yerləşən Çernobıl şəhəri tarixdə ən böyük ekoloji fəlakətlərdən birinə şahidlik edib. 200 mindən çox insanın birbaşa və dolayı ölümünə səbəb olan bu hadisə nüvə enerjisinin mülki məqsədlər üçün istifadəsi zamanı ən çox radiasiya yayılmasına səbəb olan nüvə qəzası kimi yadda qalıb.

Bu gün isə Çernobıl yenidən dünya gündəmindədir. Bəs, nə baş verib?

Ukraynanın açıqlaması

"EDnyus" xəbər verir ki, Ukrayna hakimiyyəti Rusiyaya məxsus pilotsuz uçuş aparatlarının (PUA) Çernobıldəkı zədələnmiş nüvə reaktorunu qoruyan radiasiya sığınacağını hədəf aldığını bildirir. Prezident Volodimir Zelenski Rus ordusunu dünyanı 4-cü enerji blokundan yayılan radiasiyadan qoruyan sığınacağı vurmaqda ittiham edib.

Rusiyanın mövqeyi

Rusiya tərəfi Rəsmi Kiyevin iddialarını rədd edib.

Rəsmi açıqlamada deyilir: "Bu, aldadıcı məlumatdır. Biz nüvə infrastrukturuna hücum etmirik".

BAEA-nın bəyanatı

Beynəlxalq Atom Enerjisi Agentliyi (BAEA) təsdiqləyib ki, pilotsuz uçuş aparatlarından biri 4-cü reaktoru qoruyan yeni təhlükəsizlik kapsuluna çırpılıb və kapsulun metal damında yanğına səbəb olub. 2016-cı ildə inşa edilən bu qoruyucu konstruksiyanın damında baş verən partlayışa baxmayaraq, daxili hissənin zədələnmədiyi və reaktorun içində və ətrafında aparılan ölçmələrə əsasən radiasiya səviyyəsinin normal olduğu bildirilib.

Agentlik buna baxmayaraq ehtiyatlı yanaşaraq "arxayınlaşmağa əsas yoxdur, yüksək hazırlıq vəziyyətində qalmağa davam edəcəyik" deyə açıqlamasını bildirib.