Ölkə ərazisində fevralın 24-ü gündüzədək qeyri-sabit və arabir yağıntılı hava şəraitinin davam edəcəyi, bəzi yerlərdə sulu qar, qar yağacağı gözlənilir.
"EDnews" xəbər verir ki, Milli Hidrometeorologiya Xidmətinin rəisi Nazim Mahmudov xatırladıb ki, son 40 il ərzində fevral ayında ən aşağı temperatur 2012-ci ildə qeydə alınıb.
Onun sözlərinə görə, 2012-ci il fevral ayının 1-dən başlayan şaxtalı hava şəraiti 13 gün davam edib:
“Havanın minimal temperaturu fevralın 8-də Bakıda mənfi 11 dərəcə olub, bununla da 1969-cu ilin 9-10 fevral rekordu (9.6 dərəcə şaxta) yenilənib”.
Xidmət rəisi qeyd edib ki, 2014-cü ilin fevralında isə şaxtalı dövr 8 gün davam edib və ən aşağı temperatur mənfi 7.6 dərəcə olub:
“Sonraki illərdə havanın minimal temperaturu 2021-ci ildə 5,5, 2017-ci ildə 3,4, 2023-cü ildə 3,1, 2024-cü ildə 2,8 dərəcə şaxta qeydə alınıb. Lakin qeyd olunan illərdə Bakıda və Abşeron yarımadasında şaxtalı dövrün davamiyyəti 1-3 gün olub. Bu il isə fevralın 20-dən başlayan şaxtalı hava şəraiti bir neçə gün davam edəcək”.
