Gələn il Azərbaycanın paytaxtı Bakı önəmli beynəlxalq dini tədbirə ev sahibliyi edəcək. Qafqaz Müsəlmanları İdarəsinin (QMİ) məlumatına görə, 2026-cı ildə Bakıda Müsəlman Ağsaqqallar Şurasının növbəti sammiti keçiriləcək.

Bu barədə QMİ sədri, Şeyxülislam Allahşükür Paşazadə Şuranın baş katibi Məhəmməd Əbdülsəlamla görüşündə məlumat verib. Görüş zamanı Şeyxülislam qarşılıqlı əlaqələrin möhkəmləndirilməsinin və dini liderlər arasında dialoqun əhəmiyyətini vurğulayıb. O bildirib ki, İmam Əhməd Əl-Tayibin rəhbərliyi ilə Şura İslam dünyasında birliyin möhkəmləndirilməsi və dinlərarası anlaşmanın qurulmasında ciddi addımlar atır.

“Bu mötəbər qurumun üzvü kimi bir neçə ay əvvəl keçirilmiş illik toplantıda gələcək fəaliyyət istiqamətləri üzrə mühüm qərarlar qəbul olunub,” – deyə QMİ sədri qeyd edib.

O həmçinin bu ilin fevralında Bəhreynin Manama şəhərində keçirilən və təşkilatçılarından biri Müsəlman Ağsaqqallar Şurası olan “Bir millət, ortaq tale” şüarı altında keçirilən İslamdaxili Dialoq Konfransına toxunub. Paşazadə vurğulayıb ki, bu tədbirdə Azərbaycanın dini tolerantlıq və multikulturalizm modeli yüksək qiymətləndirilib.

Görüşdə çıxış edən baş katib Məhəmməd Əbdülsəlam, Əzhərin Böyük Şeyxi, təşkilatın rəhbəri İmam Əhməd Əl-Tayibin salamlarını çatdırıb. O, Allahşükür Paşazadənin Şuranın fəaliyyətinə verdiyi töhfəyə görə minnətdarlığını bildirib.

Əbdülsəlam, həmçinin yeni seçilmiş Roma Papası XIV Leo ilə keçirilmiş görüş barədə məlumat verərək, yaxın gələcəkdə Vatikanda katolik kilsəsi ilə Müsəlman Ağsaqqallar Şurası arasında daha bir görüş planlaşdırıldığını deyib. Onun sözlərinə görə, bu dialoq dünyada dinlər arasında qarşılıqlı anlaşmanın gücləndirilməsi üçün mühüm fürsət olacaq.

Sonda tərəflər qarşılıqlı maraq doğuran digər mövzularda da fikir mübadiləsi aparıblar.

Fatimə Şükürova // EDnews