Amerikalı alimlər dəniz altında işləyən xüsusi mikroskop hazırlayıblar. Bu cihaz sayəsində mərcanların içindəki həyat çox dəqiq şəkildə izlənə bilir. Yeni mikroskop "BUMP" adlanır və onu dalğıclar özləri ilə dəniz dibinə aparırlar.

“EDnews” xəbər verir ki, alimlər bu mikroskopla mərcanların sağlamlığını onların təbii yaşadığı yerdə - dəniz dibində yoxlaya bilirlər. Əsas məqsəd son illər mərcanların ağarmasının və məhv olmasının səbəblərini araşdırmaqdır.

Mərcanlar özləri fotosintez edə bilmirlər, yəni günəş işığını birbaşa enerji kimi istifadə edə bilmirlər. Onların içində yaşayan çox xırda yosunlar (mikroyosunlar) isə bu işi görür. Bu yosunlar mərcanları qidalandırır və onların sağlam qalmasına kömək edir.

Əgər su istiləşsə və ya mühit dəyişsə, korallar bu yosunları itirirlər və ağarırlar. Bu isə onların zəifləməsinə və ölməsinə səbəb olur.

Yeni mikroskop sayəsində alimlər artıq ayrı-ayrı yosunların necə işlədiyini izləyə bilirlər. Bu, gələcəkdə mərcanları vaxtında qorumağa və onların məhv olmasının qarşısını almağa kömək edə bilər.