İki həftədir davam edən “Frankofoniya həftələri” başa çatdı və dünən “Landmark” oteldə mədəniyyət tədbirlərinin bağlanış mərasimi keçirildi.
Hafta.az yazır ki, tədbir zamanı qastronomik sərgi təşkil olunub. Sərgidə ayrı-ayrı ölkələrin milli mətbəxlərindən yeməklər, şərablar, növbənöv şirniyyatlar sərgilənib. Ən maraqlısı isı, Mildova səfirliyinin guşəsində milli geyimli gəlinciklərin nümayiş olunması idi. Frankofoniya təşkilatına üzv olan bir sıra ölkələrin Bakıdakı səfirliklərinin stendlərində həmin ölkələrin milli mətbəxlərinə aid təamlar sərgilənib və tədbir iştirakçılarının bu ləzzətlərdən dadmaq imkanı olub.
Tədbirin açılışında çıxış edən Fransanın ölkəmizdəki səfiri Oreliya Buşez, Mərakeş səfiri Adil Embarç, Meksika səfiri Rodrigo Labardini, Kosta Rika səfiri Jairo Lopez Bolanos və digər dövlətlərin ölkəmizdəki diplomatları bildiriblər ki, “Frankofoniya həftələri”nin keçirilməsində məqsədləri öz tarixləri, mətbəxləri və ümumiyyətlə milli mədəniyyətləri ilə Bakı sakinlərini və paytaxtın qonaqlarını tanış etmək məqsədi güdüblər.
Qeyd olunub ki, aprelin ilk yarısında – 15 gün davam edən “Frankofoniya həftələri” 10-dan çox Avropa dövlətinin ölkəmizdəki səfirliyinin təşkilatçılığı ilə reallaşıb. Nəzərdə tutulan mədəni tədbirlərin tam proqramını Fransa, Belçika, Kosta-Rika, Yunanıstan, Macarıstan, Mərakeş, Meksika, Moldova, Rumıniya, İsveçrə, Estoniya, Litva və Latviya səfirlikləri, eləcə də Avropa İttifaqının Azərbaycandakı nümayəndəliyi təqdim edib. “Frankofoniya həftələri” çərçivəsində rəsm və təhsil sərgiləri, konsertlər təşkil olunub, uşaqlar üçün müxtəlif məşğuliyyətlər reallaşdırılıb və mühazirələr deyilib. Həmçinin bir neçə ekran əsəri nümayiş olunub.
İndi də qastronomiya sərgisi haqda gördüklərimizdən söz açaq.
Mərakeş səfirliyinin təmsil olunduğu guşə quruluşu, təchizatı, təqdim etdiyi yemək və içəcəkləri ilə ekskluziv təsir bağışlayırdı. Burada iştirakçılara qaynar bulğur plovu, Mərakeş mətbəxinə xas nanə ətirli çay paylanıldı. Çay demişkən, Mərakeşin guşəsində çay şərq-ərəb mədəniyyətinə xas xüsusi qablarda təqdim edildiyi üçün, hər kəsin gözü orada idi desək yanılmarıq. Əlbəttə ki, təqdimatı edənlərin Mərakeşin milli geyimində olması guşənin özünəməxsusluğunu daha da artırırdı.
Macarıstan və İsveçrə səfirliklərinin guşələrində isə bu ölkələrin bayraqlarının, turizm və tarixi məlumatları özündə cəmləyən broşürlərin iştirakçılara paylanılması maraqlı idi. Çünki çoxları bu bayraqları sevə-sevə götürürdülər. Adiçəkilən iki dövlətin milli mətbəxinin təamları da məhz bu bayraqların kölgəsində daha cəlbedici görünürdü.
Eyni maraqlı mənzərəni Meksikanın stendində də görmək mümkün idi. Burada Meksika təamları ilə yanaşı bu xalqın az qala milli atributuna çevrilmiş bəzəkli və geniş açılan şlyapa-papaqlar sərgilənirdi ki, bu da iştirakçıları özünə çəkən amil idi. İnsanlar məhz həmin şlyapaları başlarına qoyaraq şəkil çəkdirmək üçün Meksika guşəsinə axışırdılar.
Yunanıstan səfirliyinin guşəsini yunanlara məxsus edən bir görünüş vardı. Sinilərə yığılmış küftəciklər, pendir və yunan mətbəxinin incisi olan zeytun hər kəsin zövqünə uyğun idi. Yunanıstanın ölkəmizdəki səfiri Nikolas Kanellosun şəxsən masa ilə ilgilənməsi də hər kəsə xoş təsir bağışlayırdı.
Fransa səfirliyinin guşəsi də əsl fransızsayağ görünüşdə idi. Burada kiçik doğranaraq çöpə keçirilmiş kolbasalar, xüsusi solfet qablarda pizzalar, digər yemək nümunələri, şirniyyatlar elə təqdim olunurdu ki, səliqə ilk növbədə diqqəti çəkirdi. Təbii ki, şərab da yeməklərə yoldaşlıq edirdi.
Rumıniya səfirliyinin guşəsi şəxsən mənim üçün doğma təsiri bağışlayırdı. Bu ola bilər ki, əziz dosumuz, səfirliyin nümayəndəsi Mixaela Lancunun şəxsən təqdimatda iştirak etməsi ilə bağlı idi. Masada peraşkilər, rumın mətbəxinə aid xüsusi yemək nümunələri qoyulmuşdu. Özü də onları şəxsən diplomat xanım Mixaela özü bişirmişdi. Bu da Rumıniya səfirliyinin təqdim etdiklərini xüsusilə fərqləndirirdi.
Latviya, həm də Litva səfirliyinin guşəsi təqdim olunan məhsulların zənginliyi ilə seçilirdi. Masanın üzərinə bir neçə növ sosika, balıq əti tərkibli yeməklər, konfetlər, qırmızı şərab, smetan, balıq konservi, hətta cipsilər düzülmüşdü. Özü də yeyəcəklər o qədər bol idi ki, boşalan sinilərə yeniləri yığılırdı. Çünki latış mətbəxi ilə tanış olmaq istəyənlərin sayı çox idi.
Tədbir konsert proqramı ilə davam edib. Konsert proqramında Fransanın “Nathalie National” orkestrinin çıxışı maraqla qarşılanıb.
Qeyd edək ki, Beynəlxalq Frankofoniya Təşkilatı fransız dili və insan hüquqlarına hörmət, qadınlar və kişilər arasında bərabərlik, ifadə azadlığı və s. kimi universal dəyərlər ilə birləşən 84 dövlət və dövlət qurumunu (58 üzv və 26 müşahidəçi) bir araya gətirir.
Vüsal Tağıbəyli
.jpeg)
