Bu gün Xalq şairi Musa Yaqubun vəfatının 1-ci ildönümüdür.
Musa Yaqub 2021-ci il mayın 7-də, ad günündən üç gün əvvəl İsmayıllı rayonunda 84 yaşında vəfat edib. Xalq şairi vəsiyyətinə əsasən doğulduğu Buynuz kəndində valideynləri və həyat yoldaşının yanında dəfn edilib.
Şairin vəfatının ildönümü ilə əlaqədar görkəmli poeziya ustasının qəbrüstü abidəsi hazırlanıb. Abidənin müəllifi Xalq rəssamı, heykəltaraş Natiq Əliyevdir.
“Poeziya başqa şeydir. Hər adama o verilmir....
Sözü hər adam danışır, ancaq poeziya dili ilə az adamlar danışır. Çünki poeziyanın özünün qanunları var. Sözə gərək təbii rəng vurasan”,- deyirdi şair.
Musa Yaqub təbiət şairi idi. Şerlərini heç vaxt otaqda yazmazdı. Fikirləşə-fikirləşə, duyğulana-duyğulana təbiətin ağuşunda yazardı... Ən məşhur şeiri “Bu dünyanın qara daşı göyərməz”dir. Musa Yaqubun bu şeirinə yazılan nəzirə qədər heç bir şairin şeirinə yazılmayıb. Musa Yaqub həm də ən qalın şeir kitabı olan şair idi. Onun kitablarından biri min səhifədən çoxdur.
.png)
Buynuz kəndindəki kərpic ev…
Şair Buynuz kəndinin ən hündür hasarlı, qırmızı kərpicli evində yaşayırdı. Həyat yoldaşının vəfatını isə son gününə qədər qəbul edə bilmirdi. Ömür-gün yoldaşı bu dünyanı tərk edib, onu yalnız, tənha qoymuşdu…
“Kişi üçün ömrünün axırında qadınsız yaşamaq bir az əzabdır” deyirdi.
Musa Yaqub həm yaradıcılıq, həm şəxsiyyət, həm də ailə baxımından xoşbəxt insan idi. Evi daim qonaq-qaralı idi, İsmayıllıdan keçən tanınmış adamları buranı dayanacaq bilirdi.
Musa Yaqub 1995–2000-ci illərdə Milli Məclisin deputatı olub. O, bir millət vəkili də olaraq camaata, seçicilərinə qarşı çox həssas idi, kimin nə problemi olardısa, kömək etməyə çalışardı.
Maraqlısı isə yaşının 80-I haqlamasına baxmayaraq, saçları ağarmamış, qapqara qalması idi. Şair özü bu barədə yarızarafat, yarı ciddi belə deyirdi:
“Çoxları yazanda başı ilə düşünür, mən isə ürəyimlə. Saçım ona görə ağarmayıb”.
Xatırladaq ki, Xalq şairi Musa Yaqub 1937-ci il mayın 10-da İsmayıllı rayonunun Buynuz kəndində anadan olub.
1967-1973-cü illərdə ADU-nun filologiya fakültəsində qiyabi təhsil alıb, həmin illərdə Buynuz kənd 8 illik məktəbinin müdiri olub. Bakıya köçəndən sonra Azərbaycan Yazıçılar İttifaqında bədii ədəbiyyatı təbliğ bürosunda direktor müavini, "Azərbaycan" jurnalında poeziya şöbəsinin müdiri vəzifəsində çalışıb. İsmayıllı rayonunda çıxan "Zəhmətkeş" qəzetinin redaktoru olub.
Ədəbi fəaliyyətə 1957-ci ildə "Azərbaycan" qəzetində çap olunan "İki qəlb, iki dünya" poeması ilə başlayıb.
2019-cu ildə "Azərbaycan Respublikasının xalq şairi" fəxri adına layiq görülüb.
O, 7 may 2021-ci ildə yaşadığı Buynuz kəndində vəfat edib. Şair parkinson xəstəliyindən əziyyət çəkirdi.
