Bu gün Azərbaycanın ilk rok opera müəllifi kimi musiqi tariximizə adını yazdıran görkəmli bəstəkar Oqtay Kazıminin doğum günüdür.
Ednews bəstəkar haqqında yazını təqdim edir:
Həyatda olsaydı bu gün 90 yaşını qeyd edəcəkdik. Aramızda olmasa da bəstələdiyi ifalar Oqtay Kazımini hər zaman musiqi sevərlərin qəlbində və yaddaşında unudulmaz və həmişəyaşar edir. Onun bəstələri hər birimizə tanışdır. “Ey həyat, sən nə qəribəsən”, “Taleyim mənim”, “Yoxmuş etibarın”, “Gözlərimin nuru”, “Əlvida”, “Məhəbbət” və daha neçə-neçə dillər əzbəri olan məşhur bəstələr məhz onun təkrarolunmaz yaradıcılığının məhsuludur.
O, 27 dekabr 1932-ci ildə Astarada anadan olub. Orta məktəbi də elə orada bitirib. Musiqi duyumu və istedadı onun yolunu Bakıdan salıb. Asəf Zeynallı adına orta ixtisas musiqi məktəbinin xor-dirijorluq fakültəsinə qəbul olub. Azərbaycanın görkəmli bəstəkarı və dirijoru, Xalq Artisti Hacı Xanməmmədovun tələbəsi olan Oqtay Kazımi hələ musiqi məktəbində oxuyarkən, «Bəxtəvər uşaqlar» adlı ilk mahnısını bəstələyib. Daha sonra Üzeyir Hacıbəyov adına Konservatoriyanın bəstəkarlıq fakültəsinə daxil olub və dahi bəstəkarımız Cövdət Hacıyevin sinifində təhsil alıb.
1966 və 1967-ci illərdə Sumqayıt Musiqi Texnikumunda müəllim kimi çalışıb. Buradakı fəaliyyəti dövründə O.Kazımi «Eksperiment» adlı estrada orkestrini yaradıb. Sonralar bəstəkar Filormoniyada musiqi redaktoru vəzifəsində çalışıb və Asəf Zeynallı adına orta ixtisas musiqi məktəbində xalq çalğı alətləri fakültəsində dərs deyib. Oqtay Kazımi uzun illər Azərbaycan musiqi tarixində populyar yer tutan «Dan ulduzu» ansamblı üçün musiqilər bəstələyib və ansamblın böyük şöhrət qazanmasında xüsusi rolu olub.
Bəstəkarımızın mahnılarını unudulmaz edən həm də onların ifaçılarıdır. Ölməz sənətkarlarımız Rəşid Behbudov, Zeynəb Xanlarova, Şövkət Ələkbərova, Flora Kərimova, Eldar Axundov, Yalçın Rzazadə, İlhamə Quliyeva, Oqtay Ağayev, Məmmədbağır Bağırzadə, Zaur Rzayev, “Qaya” və başqaları Oqtay Kazımi yaradıcılığından bəhrələniblər.
Bəstəkarın yaradıcılığı təkcə mahnılarla məhdudlaşmır. Çoxşaxəli və geniş fəaliyyəti dövründə Oqtay Kazımi bir çox simfonik əsərlərin ("Azərbaycan” rapsodiyası, "Qəhrəmanlıq” simfoniyası, "Bayram” üvertürası, "Sumqayıt Lövhələri", "Qarabağ lövhələri", "Nəğməmsən, Azərbaycan" kantatası və s.) müəllifi kimi tanınıb. Oqtay Kazımi həmçinin, teatr tamaşaları üçün də musiqi əsərləri bəstələyib.
O, "Qılınc və qələm", "Ümid", "Danabaş kəndinin əhvalatı", "Müsyo Jordan və Dərviş Məstəli şah", "Şeyx Sənan", "Ədirnə Fəthi", "Büllur sarayda" və başqa məşhur teatr tamaşalarına musiqilər yazıb.
Oqtay Kazıminin yaradıcılığı daim diqqət mərkəzindədir. Korifeylərimizlə yanaşı bu gün də gənc müğənnilər Oqtay Kazımi yaradıcılığına müaciət edir və onun məşhur mahnılarını yeni oranjimanda dinləyicilərə tədim edirlər. Zaman dəyişsə də, illər ötsə də bu mahnılar heç vaxt öz təravətini itirmir, yaşından asılı olmayaraq hər kəsin dilində zümzüməyə çevrilib, daim sevilir və seviləcək. Bir sənətkarı yaşadan və unudulmaz edən də məhz bu deyilmi?!
Oqtay Kazimi 2010 cı il 9 avqustda uzun sürən xəstəlikdən vəfat edib.
Törə Zeynallı
