“Dünən bu xəbəri eşidəndən bəri təəssüf hissi keçirirəm. Elxan Qasımov həddindən artıq ziyalı, alicənab, şəxsiyyətli bir sənətçi idi. Həm gözəl aktyor, həm rejissor idi, maraqlı filmləri vardı”.
Bu sözləri Ednews-a Xalq artisti İlham Namiq Kamal Elxan Qasımovla bağlı xatirələrdən danışarkən deyib.
“Məndən bir neçə kurs yuxarı oxuyub. Buna baxmayarq, hər zaman aramızda səmimi bir münasib var idi. Eyni filmdə çəkilməmişik, amma onunla görüşlərimizdə alicənablığına, müsbət insani xüsusiyyətlərinə şahid olmuşam. Həyatında çox faciələr yaşadı, oğlunu gənc yaşda itirdi. Bu müddət əvvəl Rasim Balayevin gecəsi olmuşdu, orada aparıcı kimi çıxış etmişdi. Hadisələr çox sürətlə cərəyan etdi. Çox heyfslənirəm ki, peşəkar insanlarımızın, sənət adamlarının sırası azalır. Peşəkarlar çox azdır. Ailəsinə, dostlarına başsağlığı verirəm. Elxan Qasımov kimi bəzi sənətçilərin heç fəxri adı yoxdur. Ona çoxdan Xalq artisti adı verilməli idi, buna layiq idi. Paradoksal vəziyyətdir, elələrinə fəxri ad verirlər ki, heç o buna layiq deyil. O, bizim qəlbimizdə daim yaşayacaq”.
Xalq artisti Rasim Balayev bildirib ki, Elxan Qasımovla 50 ildən çox dostluq ediblər:
“Elxan sırf kino adamı idi, həm rejissor, həm aktyorluqla məşğul olan peşəkar idi. İnsan kimi də gözəl xasiyətlərə malik bir adam idi. Bir dost itirmişik, mən dostumu itirdim. Azərbaycan kinosu isə daha bir böyük səbətkarı. Nə deyə bilərəm. Allah qəni-qəni rəhmət eləsin”.
Xalq artisti Əbdül Mahmudov fikirlərini bu sözlərlə ifadə edib:
"Mədəniyyətə böyük xidmətləri oldu. Heç bir qarşılıq güdmədən, təmənnasız kinomuzun inkişafı üçün əməyini, təcrübəsini əsirgəmədi. Zarafatla deyirdik ki, Allah eləsin biz səndən tez köçək bu dünyadan. Hamının xeyir, şər işlərində ləyaqətlə iştirak edirdi, can yandırırdı. Ruhu şad olsun. İtkimiz böyükdür, çox təəssüflənirəm… Heyf, tez itirdik”.
.jpg)
Qeyd edək ki, Əməkdar artist aktyor Elxan Qasımov mayın 29-da müalicə aldığı klinikada vəfat edib.
Törə Zeynal
.jpeg)
