Bu gün saat 18:00-da İstanbul Atatürk Mədəniyyət Mərkəzinin qalereyasında rəssam Eldəniz Babayevin "Zəfər müjdəsi" adlı şəxsi sərgisi açılacaq.
Ednews xəbər verir ki, İstanbul Atatürk Mədəniyyət Mərkəzinin qalereyasında rəssam Eldəniz Babayevin "Zəfər müjdəsi" adlı şəxsi sərgisi keçiriləcək.
Azərbaycan Xalq Cümhuriyyətinin 105 illiyinə və Türkiyə Cümhuriyyətinin 100 illiyinə həsr olunmuş sərgi, rəssam Eldəniz Babayevin yaradıcılığının müxtəlif mərhələlərini əhatə edir.
Sərgidə rəssamın təxminən yetmiş rəngkarlıq və qrafik əsəri nümayiş etdirilir - portretlər, natürmortlar, mənzərələr, tarixi və janr rəsm əsərləri, Azərbaycanın Vətən müharibəsində parlaq Qələbəsini, Azərbaycan və Türkiyənin qırılmaz dostluğunu, habelə Azərbaycan xalqının mədəniyyətini, adət-ənənələrini və məişətini tərənnüm edən əsərlər.
Sərgidə Ümummilli lider Heydər Əliyevin və Türkiyə Cümhuriyyətinin qurucusu Mustafa Kamal Atatürkün, həmçinin Azərbaycanın müstəqilliyinin əldə edilməsində böyük rol oynamış Türkiyə və Azərbaycan sərkərdələrinin portretləri xüsusi və hörmətli yeri tutur.
Sərgidə, həmçinin, azərbaycanlı və türkiyəli məşhur şairlərin qrafik portretləri təqdim olunur ki, onların yaradıcılığı iki qardaş xalqın azadlıq və müstəqillik ideyalarını əks etdirir.
Eyni zamanda, sərgidə rəssamın həyat və yaradıcılığını, eləcə də onun ictimai və maarifçilik fəaliyyətini əks etdirən "ELDƏNİZ BABAYEV. Zəfər müjdəsi" (müəllif Mirzə Talıbov) adlı kitab-kataloqun təqdimatı keçiriləcək.
Sərgi İstanbulda Azərbaycan Respublikasının Baş Konsulluğu, Türkiyə Mədəniyyət və Turizm Nazirliyi, Beynəlxalq Türk Mədəniyyəti Təşkilatı, Türkiyədə Azərbaycan Mədəniyyət Mərkəzi, Azərbaycanda Atatürk Mərkəzi, Azərbaycan Beynəlxalq Əlaqələr Mərkəzi (Azərbaycan-Türkiyə Təşkilatı), Azərbaycan Hava Yolları, Azərbaycan Rəssamlar İttifaqı, “Bakı” İncəsənət Qalereyası, Yeni Gallery Bakı İncəsənət Mərkəzinin dəstəyi ilə Atatürk Mədəniyyət Mərkəzinin qalereyasında keçirilir.
Rəssam haqqında qısa məlumat
Eldəniz Tarıverdi oğlu Babayev 1971-ci ildə Lənkəranın Boladi kəndində anadan olub. 1990-cı ildə A.Əzimzadə adına Azərbaycan Dövlət Rəssamlıq Məktəbini bitirib.
1997-ci ildə Azərbaycan Dövlət İncəsənət Universitetinin rəngkarlıq fakültəsini bitirib.
Rəssam Bakı İncəsənət Mərkəzinin (1989) və Azərbaycan Rəssamlar İttifaqının (2005) üzvüdür.
2006-cı ildən “Bakı” rəsm qalereyasının direktorudur. Rəssam Azərbaycan Həmkarlar İttifaqları Konfederasiyasının “Azərbaycan Bayrağı” (2011) və “Azərbaycan Ziyalısı” (2016) fəxri mükafatlarına layiq görülüb.
1998-2006-cı illərdə Bakı Mədəniyyət İdarəsinin nəzdində “Qala” rəsm qalereyasını təşkil edib. Həmçinin, rəssam, Misir və Kolumbiya səfirliklərinin mədəniyyət nişanları, Bakı Mədəniyyət İdarəsinin çoxsaylı fəxri fərmanları və diplomları ilə təltif olunub.
