Altı il əvvəl Moskovadaki Tretyakov Qalereyasında vandal bir hücuma məruz qalan, Rus rəssamlığının ən məşhur tablolarından biri olan İlya Repinin “İvan Qroznı və oğlu İvan, 16 noyabr 1581-ci il” adlı əsərinin bərpa işləri yekunlaşıb.

"EDnews" xəbər verir ki, tablo yenidən Tretyakov Qalereyasında sərgilənməyə başlayıb.

İlya Repinin 1885-ci ildə tamamladığı “İvan Qroznı və oğlu İvan, 16 noyabr 1581-ci il”  tarixi janrda çəkilmiş rəsm əsəri Rus incəsənətinin ən tanınmış nümunələrindən biridir və güclü emosional təsir gücünə malik olması ilə tanınır.

Rəsmdə Rusiya çarı IV İvan (İvan Qroznı) təsvir olunur. O, qəzəb anında təsadüfən vurduğu oğlu Çareviç İvanın ölümcül yarasını tutaraq dəhşət və peşmanlıq içində göstərilir. Oğlunun qanı atasının əllərindədir və oğlu atanın qucağında son nəfəsini verir. Rəsmin dramatik kompozisiyası tamaşaçını güclü emosiyalara qərq edir.

Məhz bu səbəbdən rəsm əsəri Rusiyada böyük rezonans doğurmuşdur. Bəzi tənqidçilər əsəri milli irsin "qara səhifələrini" ifşa etməkdə ittiham etmişlər.

Sovet dövründə əsərin simvolizmi müxtəlif ideoloji məqsədlərlə istifadə olunmuşdur.

1913-cü ildə əsər ruhi xəstə tərəfindən bıçaqla zədələnmiş, lakin sonradan bərpa edilmişdir.