Vyetnamın paytaxtı Hanoyda “P4G” stenoqramı ilə tanınan “Yaşıl inkişaf naminə tərəfdaşlıq” mövzusunda beynəlxalq forumun açılışında çıxış edən BMT Baş katibinin müavini Əminə Məhəmməd çərşənbə günü qlobal iqlim və inkişaf məqsədlərinə cavab vermək üçün intensiv fəaliyyətin zəruriliyini vurğulayıb.

  “EDnews” xəbər verir ki , həm BMT-nin Dayanıqlı İnkişaf Məqsədlərinin (DİM), həm də əlamətdar Paris Sazişinin onuncu ildönümünü qeyd edən BMT Baş katibinin müavini son on ildə əldə edilmiş əhəmiyyətli irəliləyişləri vurğulayaraq, eyni zamanda, hələ də mövcud olan əsaslı problemlərdən danışıb. O, Paris Sazişinin qəbulundan sonra əldə olunan tərəqqini yüksək qiymətləndirib, eyni zamanda, dünyanın hələ də iqlim hədəflərindən uzaq olması reallığını vurğulayıb. “Hazırda dünyada elektrik enerjisinə çıxışı olmayan 750 milyon insan var və 2 milyard nəfər təmiz qidadan məhrumdur”, -deyən Əminə Məhəmməd, həmçinin diqqəti qazıntı yanacağı emissiyaları səbəbindən dünyada uşaqlara təsir edən hava çirkliliyinin artmasına çəkib.

Mənfi göstəriciləri olan statistikaya baxmayaraq, BMT Baş katibinin müavini ümidini itirmədiyini deyib: “Ümid vacibdir, çünki o, indiki anda dözməyi asanlaşdıra bilər. Əgər sabahın daha yaxşı olacağına inansaq, bu gün çətinliyə dözə bilərik”.

BMT Baş katibinin müavini üç ümid mənbəyini sadalayıb:

Qlobal Öhdəlik: Sammitdə hökumətlərin, biznes qurumlarının, investorların və vətəndaş cəmiyyətinin nümayəndələrinin iştirakı daha davamlı, möhkəm, inklüziv və firavan cəmiyyətlər qurmaq üçün kollektiv öhdəliyi nümayiş etdirib;

Əməkdaşlıq: Enerji, su və qida sistemlərinin transformasiyasında əməkdaşlığın gücünü nümayiş etdirən “Just Energy Transition Partnerships” və “P4G” dövlət-özəl tərəfdaşlıqları kimi təşəbbüslərin irəli sürülməsi;

İqtisadi perspektivlər: İqlimlə bağlı fəaliyyətin iqtisadi faydaları; iqlim uyğunlaşmasına yatırılan hər dollar 10 dəfəyə qədər gəlir gətirə bilər.

Əminə Məhəmməd, həmçinin külək, günəş enerjisi və batareyanın saxlanması texnologiyalarının xərcləri xeyli azaltmasına diqqət çəkib və qeyd edib ki, bu texnologiyalar bir çox bazarlarda elektrik enerjisinin ən ucuz mənbələrinə çevrilib.

Fatimə Mərdanlı // EDnews