Iqlim dəyişikliyi və quraqlıqla üz-üzə qalan Afrika üçün ümidverici addım atılıb. Birləşmiş Millətlər Universitetinin Su, Ətraf Mühit və Sağlamlıq İnstitutu (UNU-INWEH) beynəlxalq tərəfdaşlarla birlikdə Afrika İttifaqının yeni Suvarma və Kənd Təsərrüfatı Su İdarəetmə Strategiyasının həyata keçirilməsi üzrə analitik hesabat hazırlamağa başlayıb.

Afrikada kənd təsərrüfatı sahələrinin böyük hissəsi hələ də yağış sularından asılıdır. Halbuki qitə yüksək suvarma potensialına malikdir. Bu səbəbdən suvarma sistemlərinin inkişaf etdirilməsi həm məhsuldarlığın artırılması, həm də iqlim dəyişikliklərinə uyğunlaşmaq baxımından həyati əhəmiyyət daşıyır.

UNU-INWEH-in layihə meneceri, professor Tafadzva Mabhaudhi bildirib ki, "Dayanıqlı suvarma təkcə məhsuldarlıqla bağlı deyil. Bu, insanlara və planetə fayda gətirən ədalətli və davamlı aqro-ərzaq sistemlərinin yaradılması deməkdir."

Yeni strategiyada su ehtiyatlarının sistemli və strukturlaşdırılmış idarə olunması əsas istiqamət kimi müəyyən edilib. Bununla yanaşı, layihənin uğurla həyata keçirilməsi üçün yalnız texniki həllərlə kifayətlənmək mümkün deyil – həm də sosial, ekoloji və idarəetmə amilləri nəzərə alınmalıdır. Buraya landşaft dəyişikliyi, torpaq istifadəsi, suya çıxış imkanlarında ədalətlilik və yerli icmalar arasında qərarvermə hüququ daxildir.

UNU-INWEH-in direktoru, professor Kaveh Madani isə vurğulayıb:
"Su, enerji və ətraf mühit sistemlərinin transformasiyası Afrikanın kənd təsərrüfatı potensialını üzə çıxarmaq və iqlim zəifliyini azaltmaq üçün açardır."

Bu strategiyanın həyata keçirilməsi yalnız Afrikada ərzaq təhlükəsizliyinin təmin olunmasına deyil, həm də qlobal miqyasda davamlı kənd təsərrüfatı və ekoloji balansın qorunmasına töhfə verə bilər. Afrika torpaqlarının canlanması təkcə bir qitənin deyil, dünyanın gələcəyi üçün də mühüm addımdır.

Fatima Şükürova // EDnews