Energetika naziri Dünya Neft Şurasının 6-cı Gənclər Forumunda çıxış edib | Eurasia Diary - ednews.net

22 Oktyabr, Çərşənbə axşamı


Energetika naziri Dünya Neft Şurasının 6-cı Gənclər Forumunda çıxış edib

İqtisadiyyat A- A A+

Energetika naziri Pərviz Şahbazov Sankt-Peterburqda Dünya Neft Şurasının təşkilatçılığı və Rusiya Energetika Nazirliyinin dəstəyi ilə keçirilən 6-cı Gənclər Forumunda iştirak edib.

Energetika Nazirliyindən Trend-ə verilən məlumata görə, forumda “Enerji transformasiyası, gələcəyin enerji xəritəsi” mövzusunda çıxış edən nazir enerji transformasiyasının əsas hərəkətverici qüvvələri kimi bərpa olunan enerji və enerji səmərəliliyi üzrə dünyada müşahidə olunan tendensiyalar və ölkəmizdə həyata keçirilən tədbirlər, qarşıya qoyulan hədəflərdən danışıb.

Enerji transformasiyasını zəruri edən amillərdən bəhs edən Energetika naziri enerji, siyasi və ekoloji təhlükəsizliklə bağlı məsələlərin ənənəvi enerji resursları ilə müqayisədə bərpa olunan enerjinin rolunu artırdığını, enerji səmərəliliyinin enerjiyə tələbatla iqtisadi artım arasındakı ənənəvi əlaqəyə yeni məzmun gətirdiyini qeyd edib. Enerjiyə çıxışı olmayan ölkələr kimi neft ölkələri üçün də enerjidə alternativ həllərin aktual olduğunu söyləyib.

Nazir deyib ki, hazırda neftin qiymət tərəddüdləri ilə yanaşı istixana qazlarının atmosferə atılması da azalmaq əvəzinə artır. Son illərdə aşağı karbonlu enerjiyə keçiddə təbii qazın rolu güclənir, lakin burada da enerji təhlükəsizliyi, mənbə və marşrutların diversifikasiyası kimi məsələlər ön plana çıxır. Dünya enerji sisteminin bugünkü bu reallığında isə məhz bərpa olunan enerji hər kəsə öz enerji və ekoloji təhlükəsizliyini təmin etməyə imkan yaradan universal bir mənbə kimi çıxış edir: “Karbohidrogenlərdən fərqli olaraq hər yerdə bu potensial var. Bu potensialdan istifadə etməklə hər bir ölkə enerji ölkəsinə çevrilə və enerji müstəqilliyini əhəmiyyətli dərəcədə artıra bilər. Eyni zamanda ətraf mühitin çirklənməsinə qarşı etibarlı müdafiə təmin edilə bilər.”

Çıxışda qeyd olunub ki, hazırda dünya üzrə enerji istehlakında ənənəvi enerji resurslarının 84,7% -lik payı ilə müqayisədə hidroenerji daxil olmaqla bərpa olunan enerji mənbələrinin payı 10,9 %-dir. Bununla belə son illər bərpa olunan enerji ilə bağlı inkişaf yüksələn xətt üzrə gedir və xərclərin sürətlə azalması ilə bərpa olunan enerji mənbələrinin rəqabət qabiliyyətinin artması, eləcə də texnologiyalar bu prosesə dəstək verir. “Qlobal enerji transformasiyası 21-ci əsrin geosiyasi xəritəsinin yenidən tərtibində mühüm rol oynayacaq. Bu xəritə yüz ildən artıq bir müddətdə mövcud olan və ənənəvi enerji əsasında formalaşmış geosiyasi xəritədən çox fərqlənəcək”, deyə nazir bildirib.

Nazir P.Şahbazov dünyanın enerji xəritəsinin tərtibində Azərbaycanın roluna da toxunub, “Cənub Qaz Dəhlizi”nin qitənin dekarbonizasiyasına verəcəyi töhfəni və ölkənin energetika sektorunda aparılan islahatların mühüm bir hissəsi kimi bərpa olunan enerji, enerji səmərəliliyi sahələrində görülən işləri də diqqətə çatdırıb.

Forum çərçivəsində Energetika naziri Rusiyanın Energetika naziri Aleksandr Novakla da görüşüb.

Görüşdə iki ölkə arasında enerji əməkdaşlğının elektroenergetika, neft-qaz istiqamətləri üzrə məsələlər müzakirə edilib. Həmçinin, “OPEC plus” əməkdaşlıq formatı çərçivəsində məsləhətləşmələr aparılıb.

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...