Azeltech MMC, xüsusi karantin rejimi ilə əlaqədar yaşanan çətinliklərə baxmayaraq, pilotsuz təyyarələrin istehsalını davam etdirir. Bu barədə şirkətin direktoru Samir Süleymanov Eurasia Diary-yə bildirib.
Süleymanovun sözlərinə görə, hazırda pilotsuz təyyarələrin sınağı davam edir.
"Hələ ki, şirkət sınaq prosesindən gözlədiyi nəticəni əldə etməyib. Bu istiqamətdə işlər daha 2-3 həftə davam edəcək.
Bu gün şirkətimiz pilotsuz təyyarələr üçün ehtiyat hissələrinin idxalı sahəsində çətinliklər yaşayır", deyə Samir Süleymanov bildirib.
O, qeyd edib ki, qlobal problemlər, xüsusən də COVID-19 səbəbiylə xaricdən 10 manat (təxminən 6 dollar) məbləğində gətirilən ehtiyat hissələrinin dəyəri yüz manata (təxminən 60 dollar) çata bilir və bu alış-veriş məqsədəuyğun deyil. Bu çətinliklər dronların istehsalı və onların sınaq müddətini dayandırır.
"Bizdə nazirliyin sərhəd və digər xidmətləri üçün yalnız pilotsuz təyyarələr deyil, digər cihazlar da, xüsusən də müdafiə məntəqələrinin təhlükəsizlik sistemi istehsal olunur", deyə şirkətin direktoru Samir Süleymanov əlavə edib.
Xatırladaq ki, Azeltech şirkəti 30 dəqiqəyə qədər olan ən çox uçuş qabiliyyətinə malik multikopterlər, kəşfiyyat dronları, zərbə endirən “kamikaze” PUA-lar kimi pilotsuz uçuş aparatlarını inkişaf etdirmişdir.
Azeltech MMC yüksək istehsal gücünə və istehsal xəttinə, həmçinin sənaye, hərbi, tibbi, kənd təsərrüfatı və digər sahələr üçün elektron cihazlar istehsal edən avadanlıqlara malikdir.