44 günlük müharibə zamanı işğaldan azad olunan Qarabağ bölgəsi, bir çox iqtisadi imkanların yaradılması məsələsini gündəmə gətirib. Qarabağ iqtisadi zona adlandırılaraq bu istiqamətdə ciddi addımlar atılmağa başlanılıb. Hazırda Qarabağa investisiya qoyub biznes layihələr həyata keçirmək uçün maraqlar günü-gündən artır.
Bu barədə ötən gün KOBİA-nın rəhbəri Orxan Məmmədov mətbuata açıqlamasında bildirib. Onun sözlərinə görə, bu günə qədər 42 nəfəri qadın olmaqla 980 nəfər agentliyə layihə təqdim edərək müraciət edib.
Digər sevindirici bir hal isə Qarabağda sahibkarlığın inkişaf etdirilməsinə dəstək üçün kiçik və orta bizneslə məşğul olanlara (veteran, qazi və şəhid ailələri) vergi barədə güzəştlərin edilməsidir. Bu barədə iqtisadiyyat nazirinin müavini Sahib Ələkbərov deyib. Lakin qeyd etməliyik ki, bu layihələrin tam uğurla həyata keçirilməsi üçün yetərli sayıla bilməz. Çünki bunun üçün sahibkarlığa dəstək əsas məqamlardan biridir.
Məsələ ilə bağlı Bakı Mühəndislik Universitetinin elmi işlər üzrə prorektoru, iqtisadi ekspert Elçin Süleymanov EDNEws-a açıqlamasında bildirib ki, Qarabağın bərpası və inkişafı hazırda ən prioritet öhtəliklərdən biridir.
“Hələ Sovet dönəmində Qarabağ kənd təsərrüfatında demək olar ki, aparıcı yerlərdə idi. Bu gün biz bu zonaya kənd təsərrüfatı ilə yanaşı turizmi də daxil edə bilərik. Qarabağda bir çox ərazilər uzun müddətdən bəri istifadəsiz qalıb və bu da kənd təsərrüfatı və sənayenin inkişafı ilə məhsulun istehsalı və ixracı üçün geniş şərait yarada bilər”.
Elçin Süleymanov sahibkarlığa dövlətin dəstəyinin vacibliyindən də danışıb. O, qeyd edib ki, burada işin daha səmərəli və operativ davam etdirilməsi üçün ilk növbədə sahibkarlar üçün elektrik, qaz xətti və yol kimi infrastrukturun tez bir zamanda yaradılmasıdır.
“Daha sonra sahibkarlığın inkişaf etməsi üçün dövlət tərəfindən faliyyəti üzrə maliyyə dəstəyi də verilməlidir. Lakin bir məqamı da bildirim ki, Qarabağ kimi zonada təkcə dövlətin deyil, həm də xarici investorların da cəlb edilməsi həm iqtisadi, həm də siyasi mənada əhəmiyyətlidir. Çünki xarici investisiya həm də xarici maraqlar deməkdir. Qarabağda açılacaq xarici şirkətlər həm də Qarabağın gələcək firavanlığını və təhlükəsizliyini təmin edə biləcək”.
Elnur Ənvəroğlu
