Xəbər verdiyimiz kimi, Nazirlər Kabineti “Satışı əlavə dəyər vergisindən azad olunan heyvandarlıq və quşçuluq təsərrüfatlarında istifadə edilən yem və yem əlavələrinin Siyahısı”nı təsdiq edib.
Bu qərarı eşidən və uzun müddətdir gündəlik zəruri ərzaq məhsullarının qiymətlərində bahalaşmadan əziyyət çəkən vətəndaşlar yumurta, süd və ət məhsullarının qiymətinin ucuzlaşacağına ümid edirlər.
Bəs yem və yem əlavələrinin ƏDV-dən azad edilməsi süd, yumurta və ət qiymətlərinə necə təsir göstərə bilər?
İqtiadçı ekspert Pərviz Heydərov bildirib ki, hökumət tərəfindən görülən bu tədbirlər əslində bazarda qiymətlərin daha da bahalaşmaması və bu tempi aşağı salmaq üçün həyata keçirilir. Onun sözlərinə görə, ƏDV-nin ləğv olunması bu qidaların ucuzlaşmasına heç bir təsir göstərməyəcək.
“Ölkədə demək olar ki, bütün məhsulların qiymətlərində ildən çox müddətdir ki, artım müşahidə olunur. Ötən ilin əvvəlindən başlanan prosesin sürəti bundan aşağı idi. Bir çox ekspertlər proqnoz edirdi ki, bu il iyun ayının sonlarına bu bahalaşma səngiyəcək, amma təəssüf ki, fevralda Rusiya-Ukrayna müharibəsinin başlaması və digər amillər nəinki bahalaşmanı dayandırmağa kömək etmədi, əksinə bunu daha da sürətləndirdi. May ayından yem və yem əlavələrinin idxalına görə də rüsumun tətbiq edilməməsi, baytarlıq sənədinin tələb olunmaması ilə bağlı qəbul edilən qərarlar da bu istiqamətdə atılan addımlardan idi. Onda da belə bir eyforiya yarandı ki, mal və qoyun ətinin qiymətləri düşəcək, amma reallıqda bu əksini tapmadı”.
İqtisadçı ekspert Natiq Cəfərli isə qeyd edib ki, istənilən halda yem məhsullarının ƏDV-dən azad edilməsi müsbət haldır, çünki bir çox hallarda bunlar xaricdən alınırdı və rüsum tutulurdu.
“Bu qərar qiymətlərin ən azından artmasının qarşısını alacaq faktora çevrilə bilər, amma sözügedən məhsulların qiymətinin ucuzlaşacağını gözləmək məncə yanlışdır”.
Qeyd edək ki, bir müddət öncə payız aylarında Azərbaycanda daha bir neçə məhsulun, süd və broyler məhsullarının yenidən bahalaşması haqqında iddialar gəzirdi.
Xatırladaq ki, tezliklə, Zəngilan rayonunda “Mozarella” pendirinin istehsalına başlanılacaq. Ağcabədi rayonunda isə artıq bir fabrik açılıb və genişlənmək üzrədir.
Gülnar Səlimova
