Türkiyədə baş verən dağıdıcı zəlzələlər hündürmərtəbəli binaların təhlükəsizliyi məsələsini gündəmə gətirib. Bəziləri həyətyanı sahələrdə inşa olunan evlərin daha təhlükəsiz olduğunu düşünür. İddialara görə, şəxsi evlərə artan maraq qiymətlərdə də artıma səbəb olub. Belə ki, yayılan məlumatlara görə, son günlərdə əmtəə bazarında həyətyanı sahələrin qiymətində artım müşahidə olunub.

Məsələni Ednews-a şərh edən daşınmaz əmlak üzrə ekspert Ramil Qasımzadə bildirib ki, şəxsi evlərin qiymətində heç bir artım yoxdur:

“Düşünmürəm ki, zəlzələ təhlükəsinə görə şəxsi evlərin qiymətlərində artım olsun. İnsanların narahatlığı müvəqqəti ajiotajdır. Hələki, bu evlərin qiymətlərində hər hansı artım müşahidə edilməyib. İnanmıram ki, son hadisələr alqı-satqı sektoruna təsir etsin. Ümumiyyətlə, qış aylarında şəxsi evlərin qiymətində ucuzlaşma olur”.

R.Qasımzadə onu da qeyd edib ki, Türkiyədəki binalarla ölkəmizdə tikilən hündürmərtəbəli binalar arasında keyfiyyət fərqi var:

“Bizdəki binalar daha keyfiyyətli və zəlzələyə dözümlüdür. Videolarda da gördük ki, Türkiyədə 90-cı illərdə inşa edilən binalar keyfiyyəsiz materiallardan tikilməklə yanaşı, təyinatı üzrə istifadə edilməyib və inşaat konstruksiyasına da düzgün riayət edilməyib. Binaların özülündə qoyulan armaturların diametri mövcud normativlərdən çox-çox aşağıdır. Onların tikintidə işlətdikləri 12 mm-lik armaturları bizim ölkədə heç su hovuzunun tikintisində istifadə etmirlər. Fərdi yaşayış evlərində ən az 16-18 mm-lik armaturlardan istifadə edilməlidir”.

Ekspert onu da əlavə edib ki, Türkiyədən fərqli olaraq ölkəmizdə inşaat sektoruna nəzarət daha güclüdür:

“Fövqəladə Hallar Nazirliyi çoxmənzilli binalarda inşaat prosesi başlayandan bitənə qədər işə nəzarət edir. Binanın tikintisinə icazə verilmədən öncə inşaat passportunda bütün detallar – istifadə olunacaq materiallar, markaları və s. göstərilir. Hər mərtəbə tikildikcə yerindəcə baxış keçirilir, yoxlamalar aparılır. Azərbaycanda tikilən binaların çoxu 8-9 ballıq təkanlara tab gətirə bilər”.

Törə Zeynallı