“Qarabağ və Şərqi Zəngəzurla yanaşı, Naxçıvanı da yaşıl enerji zonasına çevirmək planlarımız var. Naxçıvanda su elektrik stansiyasının tikintisi üçün böyük potensial mövcuddur”.
Ednews xəbər verir ki, bunu Azərbaycan Respublikasının Prezidenti İlham Əliyev martın 13-də Berlində Almaniyanın aparıcı şirkətlərinin rəhbərləri ilə görüşdə deyib.
Bu yaxınlarda orada ekspertizanın da aparıldığını bildirən dövlət başçısı deyib:
“Ola bilsin, yaxın vaxtlarda 500 meqavatlıq günəş elektrik enerjisi stansiyasının tikintisi ilə bağlı bəzi addımlarımız olsun. Eyni zamanda, Naxçıvanda ənənəvi elektrik stansiyaları da çox münasibdir. Çünki Naxçıvanın böyük ixrac potensialı mövcuddur, onun Türkiyə və İranla sərhədi var. Hər iki ölkədə elektrik enerjisinə artan tələbat var”.
Mövzu ilə bağlı iqtisadçı-ekspert Fuad İbrahimov bildirib ki, Naxçıvan uzun müddət blokada vəziyyətində idi.
“İlk növbədə enerji təhlükəsizliyi tərəfdən baxsaq görərik ki, Naxçıvan enerjini idxal edir. Son illər 9-a yaxın elektrik stansiyası tikilib. Bunların içində hidroelektrik stansiya da var. Günəş və külək enerjisindən alınan elektrik stansiyaları da kifayət qədər var. Naxçıvanda istifadə olunan elektrik enerjisinin 50 faizini artıq bərpa olunan enerji mənbələrindən alınır. Naxçıvan öz ərazisinin elektrik enerjisini ixrac etmək iqtidarındadır. Bu isə çox böyük nəaliyyət deməkdir. Həmçinin, çox ciddi prossesdir. Eyni zamanda da dövrün tələblərinə baxsaq, görəririk ki, Rusiya-Ukrayna müharibəsinin nəticəsində Avropanın enerji təhlükəsizliyi çox böyük təhlükə altında idi”.
Ekspertin sözlərinə görə, ölkəmizdə karbohidrogen ehtiyatları iqtisadi dövriyyəyə cəlb edilib.
“Bunu hər ölkə edə bilmir. Məsələn, bu günləri şimal qonşumuz Rusiya, cənub qonşumuz İran və yaxud İraq, Liviya kimi ölkələr baxmayaraq ki, zəngin sərvətləri var. Amma ondan nə istifadə edə bilir, nə də dünyaya bazarına çıxarmağı təmin edə bilirlər. Bu da o deməkdir ki, təbii sərvət xalqına xidmət edə bilmir. Bu işlərlə yanaşı paralel olaraq araşdırmalarda aparılır. Tək dəniz hövzəsində 157 kVt bayt alternativ enerji mənbəyi var. Quruda isə 40 kVt bayt enerji mövcuddur. 25 kVt bayt enerjini dövriyyəyə cəlb etmək üçün bəzi şirkətlətlərlə müqavilə imzalanıb”.
Fuad İbrahimov qeyd edib ki, işğaldan azad edilmiş ərazilərdə elektrik enerjisi ilə bağlı kifayət qədər işlər görülüb.
“Kifayət qədər qısa vaxt ərzində enerji stansiyalarını istifadəyə verilib. Artıq külək və günəş enerjinin ala biləcək ərazilər müəyyənləşib və işlər görülür. Biz “Ağıllı kənd” layihəsindəki işləri aparmaqla yanaşı alternativ enerjinin də o ərazilərdə daxili imkanları ödəmək və qalan hissəsinidə dünya bazarına çıxarmaq üçün bir çox addımlar atılır”.
Aysel Şahmar