Aprelin 25-də Azərbaycan Respublikasının Prezidenti İlham Əliyev Bolqarıstan Respublikasına səfərdə olub. Enerji sahəsində əməkdaşlıq sürətlə inkişaf etməsi Azərbaycan-Bolqarıstan əlaqələrində mühüm yer tutur. Həmçinin, Sofiyada SOCAR-ın Bolqarıstandakı ofisinin açılışı olub, Azərbaycan və Bolqarıstan prezidentləri mərasimdə iştirak edib.

Məsələ ilə bağlı iqtisadçı ekspert Natiq Cəfərli Ednews-a açıqlama verib.

O bildirib ki, Prezidentin Bolqarıstana səfərində ən əsas səbəbi Bolqarıstanda yeni bir qaz paylayıcı mərkəzinin qurulmasıdır.

“Azərbaycan qazının Bolqarıstan üzərindən digər ölkələrə ötürülməsi ilə bağlı infrastrukturun hazırlanması və yatırımların olması ilə bağlı  memarandum imzalanıb. Bu Avropa ölkələri əsasən,  Şərqi və Cənubi Avropa ölkələri üçün çox vacibdir. Azərbaycan son zamanlar Avropa ölkələrinə qaz ixracatını xeyli artırıb. Keçən il isə tarixi rekor qırmışıq demək olar”.

Ekspert vurğulayıb ki,  Azərbaycan qaz ixracatını  2027-2028-ci ilə qədər 2 dəfədə çox artırmağı düşünür.

“Təxminən 20-21 millyard m3 qaz ixracatı nəzərdə tutulub. Bunun üçün yeni insfrastruktur yeni paylayıcı şəbəkələr lazımdır. Bu nöqteyi nəzərdən səfərin Avropanın qaz təchizatında mühüm rol oynayacağı şüphəsizdir. Azərbaycana ən böyük faydası isə azalan neft gəlirlərinin artacaq neft gəlirləri ilə əvəz olunmasıdır.”

Kazımlı Rübabə