İşsizlikdən sığorta haqqında qanuna əsasən sığorta ödənişi alacaq işsizlərin sayı çoxaldılacaq və qanunun həcmi genişləndiriləcək.
Hansı işsiz şəxslərə yeni ödənişlər veriləcək?
Məsələ ilə bağlı Ednews-a danışan deputat Vüqar Bayramov qeyd edib ki, edilən əlavələrin həyata keçirilməsində əsas prioritet sığorta ödənişi alacaq işsizlərin əhatə dairəsinin genişləndirməkdi.
“Yeni dəyişikliklərə əsasən, müəssisəinin mülkiyyətçisi dəyişəndə, əvvəllər müvafiq işdə çalışan işçi işə bərpa ediləndə ödənişlər ediləcək. Bundan başqa, müəssisədə çalışmış işçi müddətli hərbi xidmətdən ehtiyata buraxıldıqdan sonra öz işinə qayıtdıqda da ödənişlər əldə edəcəklər.
Eyni zamanda, sığorta ödənişinə görə əlavələr ailədəki bütün uşaqlara şamil ediləcək. Hazırda bu əlavələr 20 faiz ilə məhdudlaşır. Yeni dəyişliklərdə isə məhdudlaşma olmayacaq. Bu halda həmin ödəniş müddətli əmək müqaviləsinin bitməsi ilə xitam hallarına da şamil ediləcək”.
Deputat sığorta stajının azaldılacağını və müəssisələrdə üzrlü səbəblərə görə iş fəaliyyəti dayandırıldıqda yeni ödənişlərin veriləcəyini də bildirib.
“Bununla da, işsizlərə sığorta verilməsi zamanı müddətli əmək müqaviləsi üzrə tələb olunan sığorta stajının 30 aydan 24 ayadək endirilməsinin də həyata keçirilməsi barədə qanun layihəsi qəbul edilib. Beləliklə, daha çox sayda vətəndaşların ödəniş almasına imkan yaranacaq. Digər bir dəyişiklik isə, fərdi məşğulluq proqramının üzürlü səbəblərə görə icra edilmədiyi halda ödənişlərin verilməsidir. Bu zaman qanunda üzürlü halların konkret olaraq müəyyənləşdirilməsi həyata keçirilib və onların tətbiqinə nəzarətin icrası dəqiqləşdirilib.
Ümumiyyətlə, qanuna edilən dəyişiklik sığorta ödənişlərinə əlçatanlığı artırıb ki, bu da daha çox vətəndaşımız bu imkandan faydalanmasına şərait yaradacaq”.
Fərid Axund