2024-cü ildə bir sıra sosial ödənişlərdə yeni artımlar hesablanacaq. Belə ki, yanvar ayından başlayaraq pensiya və sosial yardımlarda artımlar həyata keçiriləcək.
Mövzu ilə bağlı Ednews-a danışan deputat Vüqar Bayramov pensiya gəlirlərinin önümüzdəki il ərzində 11% artacağını bildirib:
“2023-cü ilin son aylarında orta aylıq əməkhaqqında 11,3% artım qeydə alınıb. Beləliklə, mövcud tendensiya davam edərsə 2024-cü ilin yanvarında pensiyalar orta hesabla 11% artırılacaq. Artımlar əmək pensiyası alanların hamısına şamil ediləcək. Yəni məbləğdən asılı olmayaraq əmək pensiyası alan vətəndaşlarımızın pensiyasının gələn aydan etibarən 11% artırılacağı gözlənilir.
Vahid indeksasiya mexanizmi formalaşdırıldığı üçün artımlar bütün əmək pensiyası alanları əhatə edir. Məsələn, 500 manat pensiya alan vətəndaşın pensiyasında, təxminən, 55 manat artım olacaq. Əlavə olaraq qeyd edək ki, artımlar məhz yanvar ayından hesablanır”.
Sosial yardımların verilməsində hansı dəyişikliklər həyata keçiriləcək sualına deputat bildirdi ki, adıçəkilən vəsaitlərin artırılması ilə ölkədə ünvanlı sosial yardımların sayı artacaq.
“Sosial yardımların ehtiyac meyarı 246 manatdan 270 manata çatdırılacaq. Ehtiyac meyarı artırıldığı üçün daha çox ailə ünvanlı sosial yardıma müraciət edə biləcək. Aylıq gəliri 800 manat olan beş nəfərlik ailə üzvləri adam başına 246 manat alırdısa, bu rəqəm 270 manat olacaq. Bununla, ailənin xərci ilə gəliri arasındakı fərq 550 manat hesablanır. Ailənin ünvanlı sosial yardıma müraciət hüququ varsa o proqram çərçivəsində ayda dövlətdən 550 manat yardım ala biləcək. Bu rəqəm qanundan öncə 430 manat idi.
Minimum əməkhaqqı isə büdcə paketi ilə deyil, il ərzində ölkə Prezidentinin imzaladığı sərəncamlarla reallaşacaq. Məlum olduğu kimi, son illər mütəmadi olaraq minimum əməkhaqqında artımlar həyata keçirilir. Bunlar vətəndaşların sosial təminatının gücləndirilməsi baxımından vacib addımlardır. 2024-cü ildə minimum əməkhaqqı məbləğinin vətəndaşların gəlirlərindən asılı olacağı gözlənilir. Gələn ilin büdcəsində ümumi xərclərin 45%-ni sosial xərclər təşkil etdiyinə görə, sosial yardımın həcmi də genişlənə bilər”.
Fərid Axund
