“Türkiyə regionun və dünyanın önəmli aktorlarından biridir. İnkişaf Yolu layihəsi Orta dəhlizə alternativ deyil.”
Ednews xəbər verir ki, bu fikirləri türkiyəli iqtisadi-ekspert Kerem Karabulut bildirib. Ekspertin sözlərinə görə, yeni ticarət yollarının yaradılması dünyada sülh və əmin-amanlığı artırır:
“Bu cür layihələr Türkiyənin əhəmiyyətini və qazancını artırmaqla yanaşı, regionun bütün aktorlarını cəlb edir. Beləcə inkişafa və sabitliyə nail olmaq üçün ölkələr bir addım daha yaxınlaşır. Bəzi ölkələr Orta dəhlizdə, digər ölkələr isə, İnkişaf Yolu layihəsindən faydalanırlar. Əslində bütün bunlar Asiya, Afrika və Avropa qitələrinin iqtisadi yolla əməkdaşlığa, sülhə, əmin-amanlığa və inkişafa nail olmaq səyləridir.”
Dünyada daha çox ticarət yollarının yaradılması dövlətlər arasında əlaqələrə necə təsir edir?
“Bu layihələrin yaradılmasında əsas məqsəd müharibəsiz iqtisadi inkişafa nail olmaqdır. Belə layihələrin dünyanın heç bir ölkəsinə ziyan vurması mümkün deyil. Məsələn, Zəngəzur dəhlizi İranla birbaşa əlaqəli başqa yolların yaranmasına və ticarətin genişləndirilməsinə səbəb ola bilər. Ona görə də, bu cür layihələr bütün dünya ölkələri tərəfindən dəstəklənməlidir. Çünki, onlar dünyaya fayda verən işlərdir.”
Fərid Axund
